महोत्तरीको भंगहा नगरपालिकाको कार्यालय र नगरभित्रका सबै वडा कार्यालयमा प्रमुख प्रशासकीय अधिकृतको माग गर्दै तालाबन्दी गरिएको छ। नगरपालिका प्रमुख संजीवकुमार साहको नेतृत्वमा गरिएको यो कदमले स्थानीय सेवा प्रवाहमा गम्भीर अवरोध उत्पन्न भएको छ।
नगरपालिका प्रमुख साहका अनुसार लामो समयदेखि प्रमुख प्रशासकीय अधिकृत नहुँदा सेवाग्राही र कर्मचारी दुवैलाई काम गर्न कठिनाई भएको छ। यसअघि तीन दिनभित्र अधिकृत पठाउन अल्टिमेटम दिइएको थियो, तर माग पूरा नभएपछि तालाबन्दी गरिएको हो।
प्रमुख साहले काठमाडौं धाएर पनि मन्त्री र सचिवलाई भेट्न नसकेको गुनासो गरेका छन्। मन्त्रालयका सचिवहरूले ‘पठाइदिन्छौं’ भन्दै आश्वासन दिए पनि कार्यान्वयन नभएको उनको भनाइ छ। उनले अबको तीन दिनभित्र अधिकृत नपठाए स्वास्थ्य र शिक्षाका सम्पूर्ण संस्था पनि बन्द गर्ने चेतावनी दिएका छन्।
प्रमुख प्रशासकीय अधिकृतको अनुपस्थितिले कार्यालयको प्रशासनिक र वित्तीय कार्य मात्र नभई विकास निर्माणका काममा समेत बाधा पुगेको छ। तीन महिनादेखि कर्मचारीले तलबभत्ता पाएका छैनन्।
बैंक खाता खोल्नमा पनि समस्या भएको छ। कोष तथा लेखा नियन्त्रक कार्यालयले नयाँ अधिकृतको नाममा मात्र खाता खोल्न मिल्ने बताएपछि समस्या थपिएको छ। चाडपर्व नजिकिँदै गर्दा तलब नपाउने अवस्था आएपछि बाध्य भएर तालाबन्दी गर्नुपरेको नगरपालिका प्रमुख साहले बताए।
तालाबन्दी गरिएका कार्यालयका चाबी प्रमुख जिल्ला अधिकारी इन्द्रदेव यादवलाई बुझाइएको छ।
