सल्यानको भेरी नदीमा जिप खस्दा बेपत्ता भएका दुई जनाको खोजी आज बिहानदेखि पुनः सुरु गरिएको छ। बुधबार दिउँसो सडकबाट करिब ५० मिटर तल खसेको जिपमा चार जना सवार थिए। दुई जना पौडिएर ज्यान जोगाउन सफल भए। दुई जना अझै बेपत्ता छन्।
नेपाल प्रहरी, सशस्त्र प्रहरीको गोताखोर टोली र स्थानीयले दिनभर खोजी गरे। तीव्र बहाव, गहिराइ र अँध्यारोका कारण बुधबारको खोजी स्थगित भएको थियो। आज बिहान डुंगा र गोताखोर टोली परिचालन गरी खोजी पुनः सुरु गरिएको जिल्ला प्रहरी कार्यालय सल्यानले जनाएको छ।
बेपत्ता हुनेमा गाडी मालिक सल्यान सिद्धकुमाख गाउँपालिका–४ का २३ वर्षीय भीमबहादुर राना छन्। अर्का बेपत्ता कुमाख गाउँपालिका–५ का करिब २३ वर्षीय जीप चालक हेमराज बीसी हुन्।
