नेपाल प्रिमियर लिग (एनपीएल) २०२६ अन्तर्गत आज विराटनगर किंग्स र पोखरा एभेन्जर्सबीच कीर्तिपुरको टीयू अन्तर्राष्ट्रिय क्रिकेट मैदानमा खेल हुँदैछ। दिउँसो १२:३० बजे सुरु हुने यो खेल दुवै टोलीका लागि अंक तालिकामा आफ्नो स्थिति सुधार्ने महत्त्वपूर्ण अवसर हुनेछ।
सन्दीप लामिछानेको कप्तानीमा रहेको विराटनगर किंग्सले हालसम्म ५ खेलमा २ जित र ३ हारसहित ४ अंक जोडेर छैटौँ स्थानमा छ। विराटनगरले चितवन राइनोज र कर्णाली याक्सविरुद्ध हार बेहोरे पनि सुदूरपश्चिम रोयल्सलाई ३५ रनले र जनकपुर बोल्ट्सलाई २ रनले पराजित गरेको थियो। काठमाडौं गुर्खाजविरुद्ध भने ९ विकेटको हार बेहोरेको थियो।
यता, कुशल भुर्तेलको कप्तानीमा रहेको पोखरा एभेन्जर्सको प्रदर्शन भने सन्तोषजनक छैन। ५ खेलमध्ये केवल १ खेल जितेको पोखराले २ अंकसहित अंक तालिकाको आठौँ स्थानमा छ। पोखराले कर्णाली याक्सलाई ६३ रनले पराजित गरे पनि सुदूरपश्चिम रोयल्स, जनकपुर बोल्ट्स, लुम्बिनी लायन्स र चितवन राइनोजसँग पराजित भएको थियो।
अंक तालिकामा सुधारको दौड
आजको खेलमा दुवै टोलीका लागि जित अनिवार्य छ। विराटनगर किंग्स शीर्ष चारमा प्रवेश गर्ने सम्भावना कायम राख्न चाहन्छ भने पोखरा एभेन्जर्स प्रतियोगितामा आफ्नो अस्तित्व जोगाउन संघर्ष गरिरहेको छ।
आजको खेलको नतिजाले एनपीएलको अंक तालिकामा थप फेरबदल ल्याउनेछ।
