वीरगञ्ज महानगरपालिकाका प्रमुख प्रशासकीय अधिकृत बसन्त बोहरामाथि लामो समयदेखि कार्यालयमा अनुपस्थित भई निवासबाटै प्रशासनिक तथा आर्थिक कारोबार सञ्चालन गरेको आरोप लागेको छ। बिहीबार राति ठेकेदारसँगको विवादमा हातपात भएपछि उनी काठमाडौं प्रस्थान गरेका छन्।
बोहराको कार्यशैलीलाई लिएर विवाद चुलिएको हो। महानगरपालिकाका लेखापालद्वय रामकुमार कुशवाहा, रूपनारायण पटेल र योजना अधिकृत अवधेश कुशवाहालगायतका कर्मचारीहरूले बोहराको निवासमै भुक्तानीसम्बन्धी काम गर्ने गरेको आरोप लागेको छ। उनीहरूमाथि आफ्नै निकटस्थ व्यक्ति र कमिसनको कारोबारमा संलग्न पक्षहरूको भुक्तानी प्रक्रिया मिलाउने गरेको आरोप लागेको छ।
पृष्ठभूमि
- वीरगञ्ज महानगरपालिकामा प्रमुख प्रशासकीय अधिकृतको नियुक्ति र सरुवाको विषयलाई लिएर पछिल्लो केही महिनादेखि विवाद जारी थियो।
- तत्कालीन प्रमुख प्रशासकीय अधिकृत अरविन्दलाल कर्णको आर्थिक तथा प्रशासनिक अधिकारसमेत रोकिएको थियो।
- प्रमुख प्रशासकीय अधिकृत बसन्त बोहराले जेठ ४ गते (२०८३) कार्यभार सम्हालेका थिए।
भुक्तानी लिन बाँकी रहेका ठेकेदार र सप्लायर्सहरूले रकम निकासाका लागि प्रमुख प्रशासकीय अधिकृत र लेखापालको खोजीमा भौँतारिनुपरेको गुनासो पोखेका छन्।
लक्ष्मी बैंक भवनमा विवाद र हातपात
- वीरगञ्जको आदर्शनगर चोकमा रहेको लक्ष्मी बैंकको भवनमा बिहीबार राति करिब ११ बजेतिर प्रमुख प्रशासकीय अधिकृत बोहराको टोली र सप्लायर्स निराजन अधिकारी नेतृत्वको समूहबीच झडप भएको थियो।
- सप्लायर्स अधिकारीको समूहले बोहराको टोली भवनभित्र बसेर कबाब र मदिरा सेवन गर्दै कागजात मिलाउने काममा लागेको आरोप लगाएको छ।
- विवाद भनाभनबाट हातपातमा परिणत भएको र सो क्रममा रामप्रसाद कुशवाहामाथि मुक्का प्रहार भएको तथा बोहरामाथि धक्कामुक्की भएको आरोप छ।
- घटनापछि प्रमुख प्रशासकीय अधिकृत बोहरा आफ्नो टोलीसहित सोही राति सिमरा पुगेको र त्यसपछि शुक्रबार बिहान काठमाडौं प्रस्थान गरेको जनाइएको छ।
- घटना भएको भोलिपल्ट शुक्रबार महानगरपालिकाका लेखापालहरू पनि कार्यालयमा उपस्थित भएनन्।
नगरवासी र ठेकेदारलाई सास्ती
वीरगञ्ज महानगरपालिका वडा नम्बर २५ का अध्यक्ष आशुतोष चतुर्वेदीले प्रमुख प्रशासकीय अधिकृत बोहराको हठकर्कपटी शैलीका कारण नगरवासी, ठेकेदार र तल्लो तहका कर्मचारीले हैरानी खेप्नुपरेको बताएका छन्। वडा नम्बर १७ का अध्यक्ष सञ्जु छतकुलीले पनि बिहीबार राति ११ बजेर ५३ मिनेटमा प्रमुख प्रशासकीय अधिकृतको निवासमा झगडा भएको सूचना प्राप्त गरेको जनाए।
यस विषयमा प्रमुख प्रशासकीय अधिकृत बसन्त बोहराको प्रतिक्रिया प्राप्त हुन सकेको छैन।
वडाध्यक्ष चतुर्वेदीका अनुसार प्रमुख प्रशासकीय अधिकृत बोहरा मंसिर १२ गते मात्रै कार्यालय फर्किने हल्ला चलेको छ।
