सप्तकोशी नदीको बाढी र कटानले सुनसरीको बराहक्षेत्र–६ र ९ तथा उदयपुरको बेलका–१, २ र ३ मा पर्ने चिलिया र श्रीलङ्का टापुका बासिन्दा बर्सेनि जोखिममा छन्। कोसीको बहाव बस्ती नजिक आइपुगेको छ। खेती र पशुपालनमा निर्भर स्थानीयलाई बर्खाको कटानले चिन्तित बनाएको छ।
कटान रोक्न स्थानीय, प्रहरी, सेना र नगर प्रहरीले बालुवा र सिमेन्ट बोराको अस्थायी तटबन्ध बनाइरहेका छन्। सप्तकोशी कटान नियन्त्रण समितिका अध्यक्ष जयकुमार माझीका अनुसार १८ स्परमध्ये नौवटा क्षतिग्रस्त भइसकेका छन्।
बेलका नगरपालिकाका प्रमुख अशोक कार्कीका अनुसार चिलिया र श्रीलङ्का टापुमा ६०० घरपरिवार जोखिममा छन्। कोशी बक्राहा नदी नियन्त्रण आयोजनाले पाँच हजार ५०० बोरा र ७० थान डोरीजाली उपलब्ध गराएको छ। बलौटे माटोका कारण दैनिक जमिन कटान भइरहेको छ। गत वर्षका तारजाली संरचना पनि नदीको बहावमा पर्न थालेका छन्।
बराहक्षेत्र नगरपालिकाका प्रमुख रमेश कार्कीले कोशी कटान राष्ट्रिय सरोकारको विषय भएको बताए। उनले संघीय सरकारले वैज्ञानिक अध्ययनका आधारमा दीर्घकालीन तटबन्ध, ड्याम र नोचजस्ता संरचना निर्माण गर्नुपर्ने र पर्याप्त बजेट विनियोजन गर्नुपर्ने माग गरे।
तीन हजार जनसङ्ख्या रहेको चिलिया टापु क्षेत्रका अधिकांश परिवार कृषि, पशुपालन र दुग्ध उत्पादनमा निर्भर छन्। बर्सेनि अस्थायी तटबन्ध र श्रमदानले बस्ती र खेतीयोग्य जमिन जोगाउने प्रयास भए पनि दीर्घकालीन समाधान हुन सकेको छैन।
