रसुवाको भोटेकोशी बाढीले बगाएका शव त्रिशूली र नारायणी नदी किनारमा भेटिएका छन्। चितवनमा हालसम्म ३६२ शव फेला परेका छन्। तीमध्ये ३३३ शवको व्यवस्थापन गरिसकिएको छ।
फेला परेका शवमध्ये १४ वटाको सनाखत भई आफन्तको जिम्मा लगाइएको छ। बाँकी शवहरूको पहिचान र व्यवस्थापन प्रक्रिया जारी छ।
वैज्ञानिक पहिचानका लागि भदौ १६ गतेदेखि शवहरूको डिएनए नमूना सङ्कलन सुरु भएको थियो। प्रहरी नायब उपरीक्षक चन्द्रभूषण यादवका अनुसार भदौ २० गतेसम्ममा ६८ जना आफन्तको डिएनए नमूना सङ्कलन गरिएको छ।
भदौ १६ गते सात पुरुषको नमूना लिइएको थियो। भदौ १७ गते २६ जनाको नमूना सङ्कलन गरियो, जसमा दुई महिला, २२ पुरुष र दुई भारतीय पुरुष नागरिक थिए।
भदौ १८ गते २२ जनाको नमूना सङ्कलन गरियो, जसमा चार महिला, १४ पुरुष, एक बालक र तीन भारतीय पुरुष नागरिक समावेश थिए। भदौ १९ गते सात जनाको नमूना लिइयो, जसमा एक महिला, चार पुरुष, एक बालक र एक भारतीय पुरुष नागरिक थिए। भदौ २० गते छ जनाको नमूना सङ्कलन गरियो, जसमा दुई महिला, एक पुरुष र तीन बालक थिए।
प्रहरीले शवहरूको पहिचान, आफन्तको डिएनए परीक्षण र हराइरहेका व्यक्तिको विवरण सङ्कलनको कामलाई निरन्तरता दिएको छ।
