निर्माण सामग्री, डिजेल तथा ढुवानी खर्चमा भएको निरन्तर मूल्यवृद्धिका कारण निर्माण व्यवसायीहरू गम्भीर आर्थिक संकटमा परेका छन्। नेपाल चेम्बर अफ कमर्स (एनसीसी) ले बिहीबार जारी गरेको विज्ञप्तिमा यो समस्याको मुख्य कारण मध्यपूर्व युद्धको प्रभाव रहेको उल्लेख छ।
सार्वजनिक खरिद ऐन तथा नियमावलीमा व्यवस्था भएको मूल्य समायोजनको प्रावधान प्रभावकारी रूपमा कार्यान्वयन नहुँदा समस्या झन् जटिल बनेको चेम्बरले जनाएको छ। लागत वृद्धि, समयमै भुक्तानी नहुनु र प्रशासनिक झन्झटका कारण विकास निर्माणका काम प्रभावित भएका छन्।
यसको असर सिमेन्ट, स्टिल, डण्डी, पाइप तथा वायर उद्योगलगायत निर्माणसँग सम्बन्धित अन्य व्यवसायमा समेत परेको छ। चेम्बर अध्यक्ष कमलेश कुमार अग्रवालद्वारा हस्ताक्षरित विज्ञप्तिमा व्यवसायीहरूलाई राहत दिन तत्काल नीतिगत निर्णय गर्नुपर्नेमा जोड दिइएको छ।
चेम्बरले सडक, ऊर्जा, जलस्रोत, शहरी विकास तथा औद्योगिक पूर्वाधारलाई प्राथमिकतामा राखी दीर्घकालीन योजना बनाउन सरकारलाई सुझाव दिएको छ। पूर्वाधार विकासलाई प्राथमिकता दिइए पनि निर्माण व्यवसायीहरू पलायन हुने अवस्था सिर्जना हुनु चिन्ताजनक भएको चेम्बरको धारणा छ।
सरकार र निजी क्षेत्रबीच सहकार्य तथा विश्वासको वातावरण कायम भए आर्थिक विकासको लक्ष्य हासिल गर्न सहज हुने विश्वास चेम्बरले व्यक्त गरेको छ।
