सुर्खेत–दैलेख सडकको दयनीय अवस्थाका कारण दैलेख पेट्रोलियम उत्खनन परियोजना प्रभावित भएको भन्दै नेपाली कांग्रेसकी प्रमुख सचेतक वासना थापाले सरकारप्रति तीव्र असन्तुष्टि जनाएकी छन्।
रफत सञ्चार क्लबमा आयोजित अन्तरसंवाद कार्यक्रममा बोल्दै थापाले नेपालकै आर्थिक रूपान्तरण गर्न सक्ने क्षमता बोकेको यस परियोजनालाई तीव्र गतिमा अघि बढाउन सरकार गम्भीर हुनुपर्नेमा जोड दिइन्।
थापाले संसदमा प्रधानमन्त्री बालेन शाहको अनुपस्थितिमाथि पनि प्रश्न उठाइन्। सांसदहरूले उठाएका विषयमा प्रधानमन्त्रीले प्रत्यक्ष जवाफ नदिनुले संवैधानिक जिम्मेवारी र संसदीय मर्यादामाथि प्रश्न उठेको उनको टिप्पणी थियो।
कांग्रेसभित्र विभाजनको चर्चा चलिरहेको विषयमा प्रतिक्रिया दिँदै थापाले पार्टीभित्रको बहस, गुट–उपगुट र विचार मन्थनलाई लोकतान्त्रिक अभ्यासको हिस्सा भएको बताइन्। महाधिवेशन नजिकिँदै जाँदा यस्ता गतिविधि स्वाभाविक हुने भन्दै उनले शीर्ष नेतृत्वले पार्टीलाई एकताबद्ध बनाएर अघि बढाउने विश्वास व्यक्त गरिन्।
