धनुषाको मिथिला नगरपालिका–९ बडहरीमा शनिबार बिहान ६:२० बजे उपमेयर विद्या भुजेल सवार प्रदेश २–०२–००१ झ ००८२ नम्बरको गाडी र बिरामी बोकेको ना २ च २३२ नम्बरको एम्बुलेन्स ठोक्किएका छन्। दुर्घटनामा उपमेयर भुजेलसहित ८ जना घाइते भएका छन्।
पूर्व–पश्चिम लोकमार्गमा भएको दुर्घटनामा एम्बुलेन्स चालक धनुषाको मिथिला नगरपालिका–१ का ४९ वर्षीय दिपेन्द्रकुमार महतोसहित एम्बुलेन्समा सवार ५ जना र उपमेयरको गाडीमा सवार ३ जना घाइते भएका हुन्।
घाइते सबैको जानकी मेडिकल कलेज, रमदैया, धनुषामा उपचार भइरहेको प्रहरीले जनाएको छ। प्रहरीले दुर्घटनाबारे अनुसन्धान थालेको छ।
