भारतीय रुपैयाँ २ अर्ब ३७ करोड लागतमा निर्माणाधीन दोधारा–चाँदनी सुक्खा बन्दरगाहको भौतिक प्रगति १२.८५ प्रतिशत पुगेको छ।
नेपाल इन्टरमोडल यातायात विकास समितिका इन्जिनियर अनिल केसीले परियोजनाको प्रगतिबारे जानकारी दिए। एक वर्षअघि सुरु भएको यसको भौतिक प्रगति १२.८५ प्रतिशत पुगेको छ। बन्दरगाहमा भन्सार, सशस्त्र प्रहरी र कर्मचारीका लागि आवाससहितका संरचना निर्माण भइरहेका छन्। हाल टर्मिनल, भन्सार भवन र अन्य आवासीय संरचना निर्माणाधीन छन्।
परियोजना ३० महिनाभित्रै सम्पन्न गर्ने लक्ष्य राखिएको छ। यसको कुल लागत भारतीय रुपैयाँ २ अर्ब ३७ करोड छ।
दोधारा–चाँदनी नगरपालिका–१ स्थित गौरीशङ्कर सामुदायिक वनमा बन्दरगाह बन्दैछ। नेपाल र भारत सरकारबीच सन् २०२३ जुन १ मा समझदारीपत्रमा हस्ताक्षर भएको थियो।
बन्दरगाहका लागि ४२.३६ हेक्टर क्षेत्रफल प्रयोग हुनेछ। यसमा दुई गोदाम, भन्सार जाँच, क्वारेन्टाइन, अध्यागमन र सुरक्षा भवन बन्नेछन्। नेपालतर्फ छ लेनको पहुँचमार्ग र महाकालीमा चार लेनको पुल सञ्चालनमा छन्। भारतले पनि आफ्नो पहुँचमार्ग निर्माण गरिरहेको छ।
