महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता वादीले महिला र बालबालिकामाथि हुने डिजिटल हिंसा नियन्त्रण गर्न सबै पक्षको सहकार्य अपरिहार्य रहेको बताएकी छन्।
प्रतिनिधिसभाको महिला तथा सामाजिक मामिला समितिमा भएको छलफलमा मन्त्री वादीले सामाजिक सञ्जालको नियमन गरिनुपर्नेमा जोड दिइन्। उनले बालबालिका र महिला सबैभन्दा बढी डिजिटल हिंसाका पीडित हुने गरेको उल्लेख गरिन्। साइबर ब्युरोलाई उजुरी प्रणालीलाई सहज र प्रभावकारी बनाउन उनले निर्देशन दिइन्।
समितिका सभापति आकृति अवस्थीले पछिल्लो समय डिजिटल हिंसा बढ्दो अवस्थामा रहेको औंल्याइन्। उनले यसलाई सम्बोधन गर्न एकीकृत डिजिटल हिंसासम्बन्धी कानुन निर्माणको आवश्यकतामा जोड दिइन्। अवस्थीले कानुन मन्त्रालय, महिला मन्त्रालयलगायत सम्बन्धित निकायलाई यो सुझाव दिइन्।
गृह मन्त्रालयका सचिव राजकुमार श्रेष्ठले साइबर सुरक्षा प्रणालीलाई प्रभावकारी बनाउनुका साथै डिजिटल साक्षरता बढाउनुपर्ने धारणा राखे। बैठकमा साइबर ब्युरोको प्रतिवेदनसमेत पेस गरिएको थियो। नेपाल प्रहरीका महानिरीक्षक दानबहादुर कार्कीले साइबर सुरक्षाको अवस्था जटिल बन्दै गएको बताए।
