रसुवागढी भन्सारका प्रमुख अधिकृतसहित ९ कर्मचारी ईभी गाडीको शंकास्पद जाँचपास प्रकरणमा अर्थ मन्त्रालयद्वारा जिम्मेवारीबाट मुक्त भएका छन्। अर्थ मन्त्रालयले उनीहरूलाई विभागमा तानेको छ। बजेटअघि नै करका दर हेरफेर हुने सूचना चुहिँदा नाकामा नआउँदै सयौँ ईभी गाडीको भन्सार जाँचपास गराएको उजुरीमाथि यो कारबाही भएको हो।
भन्सार विभागले यस विषयमा अनुसन्धान अघि बढाएको छ। अनुसन्धानका लागि छानविन समिति समेत गठन गरिएको छ। समितिको सिफारिसका आधारमा जेठ २० गते नै कर्मचारीहरूलाई जिम्मेवारीमुक्त गरिएको अर्थमन्त्रीका स्वकीय उपसचिव नवीन ढुंगानाले जानकारी दिए।
केही दिनअघि सशस्त्र प्रहरीले भन्सार छलीको आशंकामा बिवाईडी ईभी गाडीसहित ७ सय ७४ गाडी नियन्त्रणमा लिएको थियो। भन्सार विभागले उक्त विषयमा अनुसन्धान भइरहेको जनाएको छ।
