अर्थमन्त्री डा. स्वर्णिम वाग्लेले १५० युनिटसम्मको विद्युत महसुलमा लगाइएको मूल्य अभिवृद्धि कर (भ्याट) लाई लिएर अनावश्यक प्रचार भएको टिप्पणी गरेका छन्। नेपाल आर्थिक पत्रकार संघ (नाफिज) ले आयोजना गरेको कार्यक्रममा बोल्दै उनले सरकारले कठिन निर्णय गरेको बताए।
उनले १५० युनिटसम्म विद्युत खपत गर्ने उपभोक्ताले तिर्नुपर्ने अतिरिक्त कर अत्यन्त न्यून रहेको बताए। ५० युनिटसम्म निशुल्क विद्युत उपभोग हुने र बाँकीमा जम्मा तीन प्रतिशत कर लाग्ने उनको भनाइ छ।
“८–९ सय रुपैयाँको बिलमा २४ रुपैयाँ मात्रै तिर्ने हो। यहाँ आकाश नै खसेको जस्तो प्रचार गरिएको छ,” उनले भने।
अर्थमन्त्री वाग्लेले ५० लाख रुपैयाँभन्दा कम मूल्यका विद्युतीय सवारीसाधन (ईभी) मा कर घट्ने व्यवस्था गरिएको जानकारी दिए। बजेट वक्तव्यमा यससम्बन्धी सानो नोट छुटेको उनले स्वीकार गरे।
उनले यस वर्षको बजेट निर्माणमा समय र स्रोत दुवै चुनौती रहेको बताए। चैतको मध्यमा सरकारमा आएर जेठमा बजेट ल्याउनुपर्दा पर्याप्त समय नमिलेको उनको भनाइ थियो।
“यसपालीको बजेट निर्माणमा समय कम थियो र स्रोतको पनि चुनौती थियो। चैतमा आइयो, जेठमा बजेट ल्याउनुपर्यो, समय धेरै पाइएन,” उनले भने।
अर्थमन्त्री वाग्लेले दुई तिहाइ बहुमतको सरकार भएकाले जनअपेक्षा उच्च रहेको स्वीकार गरे। स्रोत र क्षमताअनुसार सन्तुलित बजेट ल्याइएको उनको भनाइ छ।
“यसवर्ष दुई तिहाईको सरकार छ, अपेक्षा चुलिएका छन्। ३५ प्रतिशत जीडीपी अनुपातमा २५–२६ खर्बको बजेट ल्याउन सकिन्थ्यो होला। तर उपलब्ध स्रोत पनि हेर्नुपर्छ। त्यसैले सन्तुलित र सानो बजेट ल्याएका छौं,” उनले भने।
उनले सरकारले ऋणमा आधारित बजेट नल्याएको दाबी गरे। आन्तरिक स्रोत परिचालनलाई प्राथमिकता दिएको उनको भनाइ छ। विगतका सरकारबाट सिर्जित खर्बौं रुपैयाँका दायित्व अहिलेको सरकारले पनि वहन गर्नुपरेको उनले उल्लेख गरे।
“पुराना दायित्वले पनि हामीलाई थिचेको छ। खर्बौंको दायित्व बोकेका छौं। जनताकै पैसा हो, पुरा गर्नुपर्यो,” उनले भने।
