अर्थमन्त्री वाग्ले: बजेट सानो, जीडीपीको २८.५% मात्र
अर्थमन्त्री डा. स्वर्णिम वाग्लेले आगामी आर्थिक वर्ष २०८३/८४ को बजेट सानो आकारको रहेको र महत्त्वाकांक्षी नभएको दाबी गरेका छन्। बजेटपछिको पत्रकार सम्मेलनमा उनले बजेटलाई कुल ग्राहस्थ उत्पादन (जीडीपी) सँग तुलना गरेर हेर्नुपर्ने बताए।
उनले बजेट ठूलो आएको भन्ने हल्ला निराधार रहेको जिकिर गरे। ‘प्रक्षेपित जीडीपी ७४ खर्ब ५८ अर्बको सापेक्षतामा २८.५ प्रतिशत बराबर बजेट आएको छ,’ उनले भने।
विगतमा कुल ग्राहस्थ उत्पादनको ३७ प्रतिशतसम्म बजेट आएको स्मरण गर्दै यो पटक त्यो ट्रेन्डलाई तोडिएको उनले बताए।
अर्थमन्त्री वाग्लेले मुलुकको ऋण आकार हाल जीडीपीको ४३ प्रतिशत हाराहारी रहेको जानकारी दिए। आगामी वर्षका लागि ४ खर्ब १० अर्ब आन्तरिक ऋण र २ खर्ब ४७ अर्ब वाह्य ऋणको लक्ष्य लिइएको छ।
उनका अनुसार हालसम्म मुलुकको कुल ऋण २९ खर्ब ७५ अर्ब पुगेको छ।
