रसुवा र नुवाकोटको बाढी प्रभावित क्षेत्रमा ५९,७३२ जनालाई हैजाविरुद्धको ‘ओरल कोलेरा भ्याक्सिन (ओसीभी)’ खोप लगाइएको छ। स्वास्थ्य सेवा विभागअन्तर्गत परिवार कल्याण महाशाखाले सार्वजनिक गरेको प्रतिवेदनले यो अभियान तीव्र पारिएको देखाउँछ।
प्रतिवेदनअनुसार रसुवामा १५,८१२ र नुवाकोटमा ४३,९२० जनाले हैजाविरुद्धको खोप प्राप्त गरे। रसुवाका गोसाइँकुण्ड, उत्तरगया, आमाछोदिङ्मो र कालिका गाउँपालिका तथा नुवाकोटको बिदुर, बेलकोटगढी, किस्पाङ र तारकेश्वर गाउँपालिकामा खोप अभियान चलिरहेको छ।
बाढी प्रभावित क्षेत्रमा स्वास्थ्यकर्मी, उद्धारकर्मी र घाइतेलाई टिटानस-डिफ्थेरिया (टीडी) खोप पनि प्रदान गरियो। रसुवाका चार स्थानीय तहमा ८२१ जनाले टीडी खोप पाए। नुवाकोटको बिदुर नगरपालिकामा ११३ जनाले यो खोप लगाए।
बाढीपछि शंकास्पद दादुराका आठ रिपोर्टमध्ये सात नमुना परीक्षण नेगेटिभ आयो। एउटा नमुनाको नतिजा आउन बाँकी छ। तीमध्ये रसुवाका छ र नुवाकोटका दुई नमुना छन्।
परिवार कल्याण महाशाखाअन्तर्गत बाल स्वास्थ्य तथा खोप शाखा प्रमुख डा. अभियान गौतमले नियमित खोप सेवा, रोग निगरानी र हैजा नियन्त्रण अभियान सँगसँगै अघि बढेको बताए। रसुवा र नुवाकोटमा दादुरा रोगविरुद्ध ‘एमआर’ खोप अभियानको तयारी सुरु भएको छ। धादिङ, गोरखा र तनहुँका प्रभावित वडामा ‘ओसीभी’ खोप अभियानको तयारी भइरहेको छ।
