फ्लाईदुबई विमानमा को-पाइलटद्वारा पाइलटमाथि आक्रमण, दुई अतिरिक्त पाइलटले जोगाए

दुबईबाट इजरायल उडेको फ्लाईदुबईको विमानमा को-पाइलटले पाइलटमाथि आक्रमण गरेपछि विमान एक मिनेटमै १७,००० फिट तल झरेको थियो।

बुधबार, सन् २०२६ सेप्टेम्बर ३० मा दुबईबाट तेल अभिभतर्फ उडेको फ्लाईदुबईको उडान एफजेड१०७३ मा यो घटना भएको हो। विमानमा १७४ यात्रु र ६ चालक दलका सदस्य गरी कुल १८० जना सवार थिए। उडानकै क्रममा को-पाइलट ओमानी नागरिक हमाम अल-हमामीले पाइलट भारतीय नागरिक स्मित मच्छारमाथि ककपिटभित्रै आक्रमण गरेका थिए।

गम्भीर घाइते भए पनि पाइलट मच्छारले ककपिटको ढोका खोल्न सफल भए। त्यसपछि यात्रु र चालक दलका सदस्यले को-पाइलटलाई नियन्त्रणमा लिएका थिए। इजरायली यात्रु यानिव हयुनले को-पाइलटलाई नियन्त्रणमा लिन र विमानलाई स्थिर बनाउन सहयोग गरेका थिए।

विमानमा यात्रा गरिरहेका दुई अतिरिक्त पाइलटमध्ये एक जना तत्काल ककपिटमा पुगेर विमानको नियन्त्रण सम्हाले। अर्का पाइलट पनि पुगेपछि दुवैले विमानलाई स्थिर बनाउन काम गरे। यात्रु डेनियल स्लिच्टरका अनुसार विमानलाई नियन्त्रणमा लिन करिब १० मिनेटभन्दा बढी समय लागेको थियो। यस क्रममा विमानको पुच्छरको केही भागसमेत क्षतिग्रस्त भएको थियो। यी दुई पाइलट तेल अभिभबाट दुबई फर्किने विमान सम्हाल्नका लागि ‘डेडहेडिङ’ गरिरहेका थिए।

विमानले आपतकालीन ‘मे डे’ सन्देश र अपहरणको संकेत ७५०० प्रसारण गरेको थियो। करिब ४५ मिनेटपछि पाइलटहरूले साउदी अरेबियाको ताबुकमा सुरक्षित अवतरण गराए। अवतरणपछि अर्को विमानमार्फत सबै यात्रुलाई इजरायल पुर्‍याइएको थियो। संयुक्त अरब इमिरेट्सका महान्यायाधिवक्ता डा. हमाद सैफ अल–शम्सीले घटनालाई सम्भावित ‘आतंकवादी हमला’ को प्रयासका रूपमा अनुसन्धान भइरहेको बताएका छन्।

घाइते पाइलट स्मित मच्छारको अवस्था स्थिर रहेको र उनको उपचार भइरहेको छ। उनले अस्पतालबाटै भारतीय प्रधानमन्त्री नरेन्द्र मोदीसँग कुराकानी गरेका थिए। को-पाइलट हमाम अल-हमामीलाई यूएई पठाइएको छ र उनीमाथि आतंकवादसम्बन्धी अनुसन्धान जारी छ। हमामीमाथि चरमपन्थी विचार र इजरायल विरोधी सामग्रीका कारण ओमानमा पहिले नै उडान प्रतिबन्ध लगाइएको थियो। विमान दुर्घटनाबाट जोगाउने दुई अतिरिक्त पाइलटहरूको पहिचान भने अझै सार्वजनिक गरिएको छैन।