प्रधानमन्त्री बालेनको चेतावनीपछि कांग्रेस सभापति गगनको जवाफ: ‘तर्साउने धेरै आए, तर्सिने बानी परेन’

प्रधानमन्त्री बालेन शाहको चेतावनीपूर्ण फेसबुक स्टाटसपछि नेपाली कांग्रेसका सभापति गगन थापाले सोमबार साँझ ‘तर्साउने धेरै आए, तर्सिने बानी परेन’ भन्दै जवाफ फर्काएका छन्, जसलाई १८ करोडको विवादसँग जोडेर हेरिएको छ।

प्रधानमन्त्री बालेन शाहले आइतबार (२०८३ कार्तिक १५ गते) फेसबुकमा ‘सही समय आएपछि, सबैको गलत समय आउँछ, एकदुई जना उम्किन्छु भनेर सपना नदेखे हुन्छ !’ भन्दै स्टाटस लेखेका थिए। त्यसको भोलिपल्ट सोमबार (२०८३ कार्तिक १६ गते) साँझ ठिक ६ बजे थापाले ‘अहिले ठीक १८:०० बजेको छ । तर्साउने धेरै आए, तर्सिने बानी परेन’ भन्दै प्रतिउत्तर दिएका हुन्।

बालेन शाहले कसलाई लक्षित गरेर उक्त स्टाटस लेखेका हुन् भन्ने स्पष्ट नभए पनि, थापाले प्रधानमन्त्री शाहलाई नै लक्षित गर्दै जवाफ फर्काएको बुझिएको छ। थापाको ‘ठिक १८:०० बजेको छ’ भन्ने भनाइलाई नेपाली कांग्रेसको विशेष महाधिवेशनमा भएको भनिएको १८ करोड रुपैयाँको आर्थिक लेनदेन विवादसँग जोडेर हेरिएको छ।

पत्रकार पक्राउ र कांग्रेसको आधिकारिकता विवाद

हालै काठमाडौंका विभिन्न सञ्चारगृहमा प्रहरी प्रवेश गरी पत्रकार पक्राउ गरेपछि प्रेस स्वतन्त्रतामाथि बहस चर्किएको छ। प्रधानमन्त्री कार्यालयले पक्राउ परेका पत्रकारलाई रिहा गर्न निर्देशन दिएको बताइए पनि, सरकारको कार्यशैलीको आलोचना भइरहेको छ। नेकपा (एमाले) र नेपाली कांग्रेसका नेताहरूले पत्रकारमाथिको धरपकडको विरोध गरेका छन्।

नेपाल पत्रकार महासंघले सञ्चारमाध्यममाथि प्रहरीले गरेको धरपकड र पत्रकार पक्राउको विरोधमा जनकपुरधाममा समेत प्रदर्शन गरेको छ।

यसैबीच, सम्पत्ति शुद्धीकरण अभियोगमा हिरासतमा रहेका विचौलिया इनम सापकोटाको बयानलाई आधार बनाएर नेपाली कांग्रेसको विशेष महाधिवेशनमा १८ करोड रुपैयाँको आर्थिक लेनदेन भएको दाबीसहित समाचार सार्वजनिक भएका छन्। कांग्रेसले भने यी आरोपको प्रतिवाद गर्दै पार्टी विधान अनुसार विशेष महाधिवेशन सम्पन्न भएको जनाएको छ। इनम सापकोटा झापाको दमक घर भएका ३१ वर्षीय युवा हुन् र उनी उच्चपदस्थ अधिकारीहरूसँग गैरकानुनी ‘नेक्सस’ गराउने विचौलियाका रूपमा अनुसन्धानमा तानिएका छन्।

रास्वपाभित्रको असन्तुष्टि र ठेक्का विवाद

प्रधानमन्त्री बालेन शाह नेतृत्वको राष्ट्रिय स्वतन्त्र पार्टी (रास्वपा) भित्र पनि आन्तरिक विवाद चुलिएको छ। पार्टी सभापति रवि लामिछाने, प्रधानमन्त्री बालेन्द्र शाह र अर्थमन्त्री स्वर्णिम वाग्लेबीचको सम्बन्ध, सरकार सञ्चालनको शैली तथा पार्टी र सरकारबीचको समन्वयलाई लिएर असन्तुष्टि उत्पन्न भएको छ। रास्वपाले पार्टी र सरकारको आन्तरिक विषय बाहिर ल्याउने सांसद र नेतामाथि कारबाही गर्ने भएको छ।

राष्ट्रिय गौरवको सुनकोसी मरिण डाइभर्सन बहुउद्देश्यीय आयोजनाको ठेक्का प्रक्रियालाई लिएर पनि सरकार र प्रशासनिक वृत्तमा विवाद उत्पन्न भएको छ। जलस्रोत तथा सिँचाइ विभागका महानिर्देशक दिनेश रजौरिया र आयोजनाका निर्देशक कृष्णप्रसाद रिजाललाई प्रहरीले पक्राउ गरी प्रधानमन्त्री तथा मन्त्रिपरिषद्को कार्यालयमा राखिएको छ। प्रधानमन्त्रीको सचिवालयले ठेक्का पुनः रद्द गरेर नयाँ प्रक्रिया सुरु गर्न दबाब दिएको दाबीसहितका समाचार आइरहेका छन्।

यसअघि: गगन थापाले सरकारको अनुसन्धान निष्पक्षता र शक्ति दुरुपयोगमाथि प्रश्न उठाए