जर्मनीको लाइपजिग–हाले विमानस्थलमा विस्फोटक उपकरण बोकेको ड्रोन फेला परेको छ। स्याक्सोनी प्रहरीले विमानस्थलमा युक्रेनी मालवाहक विमान नजिकै कर्मचारीले ड्रोन देखेपछि विशेष रोबोट परिचालन गरी त्यसलाई निष्क्रिय पारेको जनाएको छ।
प्रहरीका अनुसार ड्रोनमा जडान गरिएको डेटोनेटरलाई नियन्त्रित रूपमा विस्फोट गराइएको थियो। यसैबीच, अर्को एक अज्ञात वस्तु विमानस्थल नजिकैको मालवाहक विमानसँग ठोक्किएको र हानोभरमा अवतरणपछि विमानमा सामान्य क्षति देखिएको प्रहरीले बताएको छ।
हालैका महिनाहरूमा जर्मनीका सैन्य अड्डा, विमानस्थल र अन्य संवेदनशील क्षेत्रमा अनुमति बिना ड्रोन उड्ने घटनाहरू बढेपछि सुरक्षा सतर्कता उच्च पारिएको छ।
जर्मन अधिकारीहरूले यस्ता गतिविधिमा रुसी एजेन्टहरूको संलग्नता हुन सक्ने आशंका व्यक्त गरेका छन्। यद्यपि, रुसले यस विषयमा कुनै प्रतिक्रिया दिएको छैन।
