रौतहटको फतुवा विजयपुर नगरपालिकाका निलम्बित मेयर गोपाल राय यादवलाई भ्रष्टाचार मुद्दामा सर्वोच्च अदालतले पनि दोषी ठहर गरेको छ। विशेष अदालतले यसअघि सुनाएको ३ वर्ष कैद र १५ लाख रुपैयाँ जरिवानाको फैसलालाई सर्वोच्चले सोमबार सदर गरेको हो।
लालबकैया नदीको ढुंगा, गिट्टी तथा बालुवा ठेक्का प्रकरणमा सार्वजनिक सम्पत्तिको दुरुपयोग तथा अनियमितता गरेको आरोपमा यादवविरुद्ध भ्रष्टाचार मुद्दा दायर भएको थियो। सोही मुद्दामा विशेष अदालतले गरेको फैसला चित्त नबुझी यादव सर्वोच्च अदालत पुगेका थिए।
सर्वोच्च अदालतले भने यादवको पुनरावेदन जिकिर नपुगेको भन्दै खारेज गरिदिएको छ। यससँगै विशेष अदालतको फैसला कार्यान्वयनको बाटो खुलेको छ। यस प्रकरणमा ठेक्का प्रक्रियामा समेत गम्भीर अनियमितता भएको आरोप छ।
