रासायनिक मलले माटोको उर्वराशक्ति क्षीण बनाएपछि प्रतिनिधि सभाका सांसदहरूले ‘ग्रीन हाइड्रोजन’ प्रविधिबाट मल उत्पादनको माग गरेका छन्।
शुक्रबार सिंहदरबारमा बसेको कृषि, सहकारी तथा प्राकृतिक स्रोत समिति बैठकमा सांसदहरूले रासायनिक मलले उत्पादन र जनस्वास्थ्यमा गम्भीर असर पारेको बताए।
रास्वपा सांसद केपी खनालले विद्युत् प्रयोग गरी ग्रीन हाइड्रोजनबाट मल उत्पादनमा जोड दिए। उनले इजरायलको उदाहरण दिँदै नेपालमा कृषि उत्पादनको विशाल सम्भावना औँल्याए।
राप्रपा सांसद ताहिर अली भाटले वार्षिक मल अभाव अन्त्य गर्न स्पष्ट कार्ययोजना माग गरे। उनले स्वदेशमै मल कारखाना स्थापना गरी कृषि पेसालाई सम्मानित बनाउनुपर्नेमा जोड दिए। भाटले राजनीतिक परिवर्तनले पनि मल समस्या नसुल्झिएको भन्दै सरकार मल कारखानाबारे स्पष्ट हुनुपर्ने बताए।
कांग्रेस सांसद गीताकुमारी सेन्दाङले किसानलाई तत्काल रासायनिक मल उपलब्ध गराउन सरकारसँग माग गरिन्। उनले बाँझो जमिन सुकुमबासीलाई लिजमा दिई उपयोगमा ल्याउन सुझाव दिइन्। विदेशमा रहेका युवालाई समेत कृषिसँग जोड्ने वातावरण बनाउनुपर्ने उनको भनाइ थियो।
अधिकांश सांसदले बाँझो जमिनलाई खेतीयोग्य बनाउन, सुकुमबासी र युवालाई कृषि शिक्षा तथा रोजगारी दिनुपर्नेमा जोड दिए।
