भारतले गहुँ निर्यातमा लगाएको चार वर्ष पुरानो प्रतिबन्ध तत्काल लागू हुने गरी हटाएको छ। विदेश व्यापार महानिर्देशनालय (डीजीएफटी) ले गहुँको निर्यात नीतिलाई ‘प्रतिबन्धित’ बाट ‘स्वतन्त्र’ मा परिवर्तन गरेको सूचना जारी गरेको छ।
सन् २०२२ को मेमा भारतले गहुँको घरेलु आपूर्ति र मूल्य नियन्त्रण गर्न निर्यातमा प्रतिबन्ध लगाएको थियो। देशमा गहुँको पर्याप्त मौज्दात र बढेको उत्पादनले किसानलाई थप बजार उपलब्ध गराउन निर्यात खुला गरिएको सरकारले जनाएको छ।
भारतले सन् २०२५-२६ को बाली वर्षमा १२ करोड ६ लाख ५० हजार टन गहुँ उत्पादन गरेको छ। यो अघिल्लो वर्षको तुलनामा २.३ प्रतिशत बढी हो।
खाद्य तथा सार्वजनिक वितरण सचिव सञ्जीव चोपडाका अनुसार गहुँको घरेलु मूल्य कम रहेकाले निर्यात खुला गर्दा मूल्यमा सुधार आउनेछ। यसले किसानको आम्दानी बढाउनेछ। आगामी बाली सिजनमा किसानलाई गहुँ खेती बढाउन प्रोत्साहन मिल्नेछ।
सरकारले देशमा पर्याप्त गहुँ भण्डारण रहेकाले निर्यात खुला गर्दा घरेलु बजारमा आपूर्ति समस्या नहुने विश्वास व्यक्त गरेको छ। यस कदमले किसानले थप बजार पाउने र उत्पादनको उचित मूल्य प्राप्त गर्ने अपेक्षा छ।
