इन्डोनेसियाको सेन्ट्रल जाभा प्रहरीले सात नेपाली नागरिकलाई अन्तर्राष्ट्रिय अनलाइन ठगी गिरोहमा संलग्न रहेको आरोपमा पक्राउ गरेको छ। सोलो राया क्षेत्रमा सञ्चालित गिरोहमा उनीहरूको संलग्नताको आशंका छ।
प्रहरीका अनुसार पक्राउ परेका सात नेपाली र चार म्यानमारका नागरिकले ‘रोमान्स स्क्याम’ शैली अपनाएका थिए। उनीहरूले पीडितसँग भावनात्मक सम्बन्ध बनाएर विश्वास जित्ने र त्यसपछि नक्कली लगानी योजना तथा क्रिप्टोकरेन्सीमा लगानी गर्न प्रलोभन दिन्थे। प्रारम्भिक अनुसन्धानले यो गिरोहले करिब ४१.१ अर्ब इन्डोनेसियाली रुपैयाँ बराबरको कारोबार गरेको देखाएको छ।
प्रहरीले ‘पीटी डिगी ग्लोबल कन्सल्टेन्ट’ नामक कम्पनीको कार्यालय र ६ वटा भाडाका कोठासहित ७ स्थानमा छापा मारेको छ। उक्त कम्पनी कामदार भर्ना गर्ने र ठगी सञ्चालनको मुख्य केन्द्र भएको आशंका छ। केही आरोपितले भाडाका कोठाबाटै ठगी चलाएको पाइएको छ।
अपराधीहरू टिन्डर, ट्यानट्यान, बम्बलजस्ता डेटिङ एप र फेसबुकमार्फत पीडितसँग सम्पर्क गर्थे। विश्वासको सम्बन्ध बनेपछि व्यक्तिगत म्यासेजिङ एपमा कुराकानी सार्दै लगानीका नाममा रकम जम्मा गर्न दबाब दिन्थे। ठगीलाई विश्वसनीय बनाउन नक्कली पहिचान र महिलाका फोटो/भिडियो प्रयोग गरिएको थियो। पीडितको विश्वास जित्न महिलामार्फत भिडियो कलसमेत गराइन्थ्यो।
पक्राउ परेका नेपालीमध्ये चार महिला र तीन पुरुष छन्। सबै २० वर्ष उमेर समूहका युवा हुन्। प्रहरीका अनुसार उनीहरूलाई आकर्षक रोजगारीको प्रलोभन देखाएर इन्डोनेसिया ल्याइएको थियो।
नेपाली महावाणिज्यदूतावासको समन्वयमा शीघ्र निर्णय नभए कानुनी जटिलता बढ्नेछ। अदालतमा मुद्दा दर्ता भएपछि उनीहरूलाई जेल सजाय हुने सम्भावना उच्च रहेको अधिकारीहरूले बताएका छन्।
