इनरुवा नगरपालिका-१० स्थित जाल्पापुर चम्राही टोलमा को.१ च ८२७९ नम्बरको पिकअप गाडीमा गाँजा लोड गर्दै गरेका ३० वर्षीय रामबहादुर यादव पक्राउ परेका छन्। जिल्ला प्रहरी कार्यालय सुनसरीले शनिबार बिहान १४५४ किलोभन्दा बढी गाँजा बरामद गरेको हो।
प्रहरीले ४७ वटा ठूला पोकामा प्याक गरिएको गाँजा गाडीमा लोड गर्ने क्रममा यादवलाई रङ्गेहात पक्राउ गरेको हो। बरामद गरिएको लागूऔषधको यकिन तौल १ हजार ४ सय ५४ किलो ८ सय ७० ग्राम रहेको प्रहरीले जनाएको छ।
यो गाँजा कहाँबाट ल्याइयो र कहाँ लैजान लागिएको थियो भन्ने विषयमा जिल्ला प्रहरी कार्यालय सुनसरीले अनुसन्धान अघि बढाएको छ।
