काठमाडौंको थानकोटमा २५ वर्षीय जाकिर मन्सुरीको चक्कु प्रहारबाट हत्या भएको छ।
चन्द्रागिरि नगरपालिका-३ खरिबोटमा गएराति उनलाई भेनाजु समी अहमदले तरकारी काट्ने चक्कु प्रहार गरेका थिए।
जिल्ला प्रहरी परिसर काठमाडौंका प्रवक्ता, एसपी पवन भट्टराईले यो घटना पुष्टि गरे। जाकिर र अहमद दुवै महोत्तरीका बासिन्दा हुन्।
प्रारम्भिक अनुसन्धानमा ३८ वर्षीय अहमदले घरायसी विवादमा साला जाकिरलाई चक्कु प्रहार गरेको खुलेको छ।
चक्कु प्रहारबाट घाइते मन्सुरीलाई सतुङ्गलस्थित मेडपोइन्ट अस्पताल पुर्याइयो। चिकित्सकले राति साढे ९ बजे उनलाई मृत घोषणा गरे।
घटनालगत्तै प्रहरी वृत्त थानकोटले समी अहमदलाई नियन्त्रणमा लियो। एसपी भट्टराईले घटनाको थप अनुसन्धान भइरहेको बताए।
मृतक जाकिरको शव पोष्टमार्टमका लागि त्रिवि शिक्षण अस्पताल पठाइएको छ।
