बागमती नदीको बाढीले कीर्तिपुर–१० को सुन्दरीघाटस्थित राधास्वामी सत्संग होल्डिङ सेन्टर डुबाएको छ। शुक्रबार राति १:३८ बजे डुबानको सूचना पाएपछि सशस्त्र र नेपाल प्रहरीको टोलीले १५४ जनामध्ये ५४ जनाको उद्धार गर्यो। उद्धार गरिएकालाई त्रिभुवन विश्वविद्यालय परिसरको स्मृति भवनमा सारिएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार ६ जना आफन्त वा होस्टलमा गएका छन्। बाँकी ९४ जना होल्डिङ सेन्टरमै बसेका छन्। वैशाख १२ गते बस्ती हटाइएका विस्थापितलाई सरकारले अस्थायी रूपमा यहाँ राखेको थियो। नागार्जुन–इचङकुनारायणको होल्डिङ सेन्टरमा स्थायी व्यवस्थापनको आश्वासन पाएका उनीहरू अहिले सेन्टर खाली गर्नुपर्ने दबाबमा छन्।
वृद्धवृद्धा, दीर्घरोगी, एकल महिला, मजदुर र बालबालिकाको बसोबास, उपचार, रोजगारी र शिक्षा अन्योलमा छ। ७० वर्षीया नरमती खत्री शान्तिनगरबाट विस्थापित भएर यहाँ पुगेकी थिइन्। उनले राहत रकमले औषधि किन्ने कि खानाको जोहो गर्ने भन्ने दोधारमा परेको गुनासो गरिन्।
डिलमाया परियार दलित र होल्डिङ सेन्टरबाट आएको भन्दै कोठा नपाएको बताउँछिन्। स्वास्थ्य समस्याले काम गर्न नसक्दा जीविकोपार्जन कठिन छ। उनले सरकारले कम्तीमा सुरक्षित बसोबासको व्यवस्था गर्नुपर्ने माग गरिन्।
इचङकुनारायणको होल्डिङ सेन्टर खाली गर्न अधिकार सम्पन्न बागमती सभ्यता एकीकृत विकास समितिले शनिबारसम्मको समयसीमा दिएको छ। यसअघि असार १९ र २७ गतेसम्मको समय दिइएको थियो। बागमती नदीमा बहाव बढिरहेकाले तटीय क्षेत्रका बासिन्दालाई उच्च सतर्कता अपनाउन आग्रह गरिएको छ।
