कोशी प्रदेशसभाले ‘कोशी प्रदेश दलित अधिकारका सम्बन्धमा व्यवस्था गर्न बनेको विधेयक’ लाई दफावार छलफलका लागि सामाजिक विकास समितिमा पठाएको छ। प्रदेशका सामाजिक विकासमन्त्री गीता तिम्सिनाले प्रस्तुत गरेको प्रस्ताव बहुमतले पारित भयो।
विधेयकमा प्रदेशसभा सदस्य अमृत अर्याल र शोभा चेम्जोङले संशोधन प्रस्ताव दर्ता गराएका छन्। यससँगै विधेयक विषयगत समितिमा पठाइएको हो।
बैठकमा खानेपानी, सिँचाइ तथा ऊर्जामन्त्री तिलचन पाठक र भौतिक पूर्वाधार विकासमन्त्री जीवन आचार्यले शून्य र विशेष समयमा उठेका प्रश्नहरूको जवाफ दिए।
विशेष समयमा नेकपा (एमाले) कोशी प्रदेशसभा संसदीय दलका उपनेता तिलकुमार मेङ्याङ्बोले भोटेकोशी नदीको बाढीले पुर्याएको जनधनको क्षतिप्रति दुःख व्यक्त गरे। उनले यस्ता घटनाबाट पाठ सिक्दै सरकारले समयमै ध्यान पुर्याउनुपर्ने र ग्रीन आर्मी नेपाल संस्था खारेज गर्नुपर्ने माग गरे।
शून्य समयमा प्रदेशसभा सदस्य गणेशप्रसाद उप्रेती, यशोदा कायस्त, मीना श्रेष्ठ, शिला दीक्षित कार्की, नम्वरलाल धिमाल, गीतादेवी रेग्मी, गयानन्द मण्डल र तारादेवी ढकालले समसामयिक विषयमा बोले।
प्रदेशसभा बैठक अर्को सूचना जारी नभएसम्म स्थगित भएको छ।
