कोशी प्रदेशमा साउन ४ गतेसम्म ७३.९४ प्रतिशत धान रोपाइँ सकिएको छ। उच्च पहाडका तीन जिल्लामा १५ हजार ३८३ हेक्टरमध्ये नौ हजार २४१ हेक्टरमा रोपाइँ सम्पन्न भएको छ। मध्य पहाडका आठ जिल्लामा ६७ हजार ७१७ हेक्टरमध्ये ४८ हजार ७६६ हेक्टरमा रोपाइँ सकिएको छ। तराईका तीन जिल्ला झापा, मोरङ र सुनसरीमा एक लाख ९३ हजार २८५ हेक्टरमध्ये एक लाख ४६ हजार ३४२ हेक्टरमा रोपाइँ सकिएको छ।
यता, देशभरि साउन पहिलो सातासम्म ७९.३६ प्रतिशत धान रोपाइँ सम्पन्न भएको छ। १३ लाख ७३ हजार ८६२ हेक्टर धान रोप्न योग्य क्षेत्रफलमा १० लाख ९० हजार ३३६ हेक्टरमा रोपाइँ सकिएको छ। सुदूरपश्चिम प्रदेशमा ९०.६७ प्रतिशत रोपाइँ सम्पन्न भइसकेको छ।
मधेश प्रदेशमा हालसम्म ७८.६० प्रतिशत भूभागमा रोपाइँ सकिएको छ। गत वर्ष ११ साउनसम्म मधेशमा जम्मा ५१.८२ प्रतिशत मात्र रोपाइँ भएको थियो। लुम्बिनी प्रदेशमा ८०.६५ प्रतिशत, बागमती प्रदेशमा ७७.३३ प्रतिशत, गण्डकी प्रदेशमा ७८.३६ प्रतिशत र कर्णाली प्रदेशमा ७७.०५ प्रतिशत रोपाइँ सम्पन्न भएको छ। गत वर्षको तुलनामा यस वर्ष समग्र रोपाइँको अवस्थामा सामान्य वृद्धि देखिएको छ।
