विराटनगर । विपक्षी दलहरूले कोशी प्रदेश सभाको बैठक अवरुद्ध पारेका छन्। नीति तथा कार्यक्रम पारित गर्ने प्रक्रियामा संशोधनका लागि पर्याप्त समय नदिएको भन्दै विपक्षीले बैठकमा अवरोध खडा गरेका हुन्।
विपक्षीको अवरोधका कारण सरकारले ल्याउन लागेको बजेटको सिद्धान्त र प्राथमिकतासम्बन्धी कार्यसूची अगाडि बढ्न सकेको छैन। यसले प्रदेशको आगामी आर्थिक वर्षको बजेट निर्माण प्रक्रियामा ढिलाइ हुने देखिएको छ।
विरोध प्रदर्शनका क्रममा नेकपाका सांसद तथा पूर्व मुख्यमन्त्री राजेन्द्र राई रोष्टममा पुगेका थिए। विपक्षी दलहरूको यो कदमले प्रदेश सभाको कामकारबाही प्रभावित भएको छ।
