कोशी प्रदेशका १ लाख ६३ हजार २ सय ९९ घरहरू बाढी, पहिरो र हिमताल विस्फोटनको उच्च जोखिममा छन्। १७ हजार ३ सय ३७ घरहरूलाई तत्काल सुरक्षित स्थानमा स्थानान्तरण गर्नुपर्ने अवस्था छ।
आन्तरिक मामिला तथा कानून मन्त्रालयको ‘मनसुन पूर्वतयारी तथा प्रतिकार्य प्रदेश कार्ययोजना’ अनुसार प्रदेशका १४ जिल्लाका १ लाख ४५ हजार ९ सय ६२ घर बाढी, पहिरो र हिमताल विस्फोटनको उच्च जोखिममा छन्।
प्रदेशमा बाढीले १ लाख १० हजार ४ सय २१ घर प्रभावित हुने प्रक्षेपण छ। १५ हजार ६० घर तत्काल सार्नुपर्नेछ। पहिरोले २३ हजार ९ सय ३१ घर जोखिममा छन्। २ हजार २ सय ७७ घर नसारे ठूलो क्षति हुनेछ। हिमताल विस्फोटनले ११ हजार ६ सय १० घर जोखिममा छन्।
तराईका मोरङ, सुनसरी र झापा बाढी र डुबानले बढी संवेदनशील छन्। मोरङमा ४२ हजार ५ सय १७ घर जोखिममा छन्। ४ हजार ५ सय ९६ घर सार्नुपर्नेछ। सुनसरीमा ३० हजार ५ सय १२ घर जोखिममा छन्। ६ हजार ९ सय १९ घर तत्काल सार्नुपर्नेछ। झापामा १९ हजार ४ सय ४१ घर बाढीको जोखिममा छन्। २ हजार २ सय ५० घर सार्नुपर्नेछ। उदयपुरमा ७ हजार ५ सय ४४ घर बाढीको जोखिममा छन्। ५ सय ३७ घर सार्नुपर्नेछ।
पहिरोको दृष्टिकोणले पाँचथर जिल्ला बढी जोखिमयुक्त छ। ३ हजार ७ घर पहिरोको खतरामा छन्। ५४ घर सार्नुपर्नेछ। संखुवासभामा २ हजार ६ सय ५० घर पहिरोको जोखिममा छन्। ४ सय ४६ घर तत्काल सार्नुपर्नेछ। सोलुखुम्बुमा २ हजार ५ सय ७४ घर जोखिममा छन्। १ सय ३० घर सार्नुपर्नेछ।
हिमताल विस्फोटनले उदयपुर र सुनसरीमा बढी जोखिम छ। उदयपुरका ३ हजार ५ सय ६२ र सुनसरीका ३ हजार ३१ घर हिमताल बाढीको प्रत्यक्ष जोखिममा छन्।
तत्काल स्थानान्तरण गर्नुपर्ने १७ हजार ३ सय ३७ घरका लागि सुरक्षित आश्रयस्थल आवश्यक छ। पूर्वसूचना प्रणाली प्रभावकारी बनाउनुपर्छ। सुरक्षा निकाय उच्च सतर्कतामा रहनुपर्छ। मनसुनले हुनसक्ने क्षति न्यूनीकरण गर्न तीनै तहका सरकारबीच समन्वय जरुरी छ।
