कोशी नदीमा पानीको बहाव बढ्दो क्रममा छ। उपल्लो जलाधार क्षेत्रमा निरन्तर वर्षाले सोमबारसम्म नदीको जलसतह छ मिटरको सतर्कता तह पार गर्ने सम्भावना छ।
विभागकी बाढीविद् सरस्वती विष्टले उपल्लो तटीय क्षेत्रमा भइरहेको वर्षाले बहाव उल्लेख्य बढ्नसक्ने बताइन्। आज साँझसम्म जलसतह ४.७८ मिटर पुगेको छ। आज राति पनि वर्षाको सम्भावना रहेकाले सोमबार बिहानसम्म नदीले छ मिटरको सतर्कता तह पार गर्न सक्ने अनुमान छ।
विष्टका अनुसार जलसतह छ मिटर पुगेमा सतर्कता तह र सात मिटर पुगेमा खतरा तह मानिनेछ। नदी तटीय क्षेत्रका बासिन्दाले उच्च सतर्कता अपनाउनुपर्ने उनको भनाइ छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका निमित्त कार्यकारी प्रमुख प्रदीपकुमार कोइरालाले सम्भावित बाढी जोखिमलाई ध्यानमा राख्दै कोशी ब्यारेजका ५२ ढोका खोल्ने विषयमा समन्वय भइरहेको जानकारी दिए।
उनले बाढीको अवस्था निरन्तर अनुगमन भइरहेको र आवश्यकतानुसार पूर्वतयारी तथा प्रतिकार्यका संयन्त्र तयारी अवस्थामा राखिएको बताए।
विभागले देशका विभिन्न स्थानमा भारीदेखि अतिभारी वर्षाको पूर्वानुमान गरेको छ। यसले बाढी, पहिरो र डुबानको जोखिम बढाउनेछ। नदी तटीय क्षेत्रका बासिन्दा, यात्रु तथा स्थानीय तहलाई उच्च सतर्कता अपनाउन आग्रह गरिएको छ।
