थमन विक हत्या प्रकरणमा दोषी ठहर भई कैद सजाय पाएका एमालेका पूर्वसांसद लक्ष्मी महतो कोइरीलाई सर्वोच्च अदालतले थुनामुक्त गर्न आदेश दिएको छ। उच्च अदालत जनकपुरले यसअघि कोइरीलाई ५ वर्ष कैद सजाय सुनाएको थियो।
कोइरीका छोरा मनोज कुमार महतोले दायर गरेको बन्दीप्रत्यक्षीकरण रिटमा सुनुवाइ गर्दै सर्वोच्चले यस्तो आदेश दिएको हो। सर्वोच्च अदालतको मुद्दा तथा रिट महाशाखाले कारागार कार्यालय महोत्तरी, जलेश्वरलाई कोइरीलाई अन्य कुनै मुद्दामा थुनामा राख्नु नपर्ने भए बिहीबार थुनामुक्त गर्न निर्देशन दिएको छ।
प्रहरीले कोइरीलाई असार १८ गते महोत्तरीको गौशालाबाट नियन्त्रणमा लिएको थियो। उच्च अदालत जनकपुरले जिल्ला अदालतको सफाइको फैसला उल्ट्याउँदै उनलाई ५ वर्ष कैद सजाय सुनाएको थियो। यसअघि महोत्तरी जिल्ला अदालतले कोइरीलाई उक्त मुद्दामा सफाइ दिएको थियो।
