मधेस प्रदेशका १६ प्रतिशत बालबालिका कुपोषणको चपेटामा छन्। मिथिला नगरपालिकाका स्वास्थ्य शाखा प्रमुख अशोक भण्डारीले अभियानमार्फत गरिएको परीक्षणले यो तथ्य उजागर गरेको बताए।
स्वास्थ्य निर्देशनालय, मधेस प्रदेशले १३३ स्थानीय तहमा गरेको पोषण अवस्थाको परीक्षणमा दुई लाख ८३ हजार ३०८ बालबालिकाको स्वास्थ्य मूल्याङ्कन गर्यो। यसमध्ये ३५ हजार ८८३ जना कुपोषित, आठ हजार ७७१ जना शीघ्र कुपोषित भेटिए। दुई लाख ३३ हजार १८२ बालबालिका सामान्य अवस्थामा थिए।
विश्व स्वास्थ्य सङ्गठन (डब्लुएचओ) को मापदण्डअनुसार यो अवस्था सङ्कटपूर्ण मानिन्छ। मधेस प्रदेशमा कुपोषित तथा शीघ्र कुपोषित बालबालिकाको कुल सङ्ख्या ४४ हजार ६५४ पुगेको छ। यो सङ्ख्या परीक्षण गरिएका बालबालिकाको १५.७६ प्रतिशत हो।
मुख्यमन्त्री कृष्णप्रसाद यादवले गरिबी, अशिक्षा, पोषण चेतनाको कमी, सरसफाइको अभाव र असन्तुलित खानपानले कुपोषण जटिल बनाएको बताए। स्वास्थ्य सचिव डा. प्रमोद यादवले कृषि उत्पादनमा सम्पन्न प्रदेशमा बाल कुपोषणको उच्च दर चिन्ताजनक रहेको उल्लेख गरे।
मधेस प्रदेशमा नेपालको कूल जनसङ्ख्याको २२ प्रतिशत हिस्सा बस्छ। करिब २९ प्रतिशत बालबालिका यही प्रदेशमा जन्मिन्छन्।
