आगामी आर्थिक वर्ष २०८३/८४ को बजेटमाथि छलफल अघि बढाउन मधेस प्रदेश सभाको बैठक आज दिउँसो १ बजे बस्दैछ। आर्थिक वर्ष सकिन पाँच दिन मात्र बाँकी छ। बजेट पारित नभए प्रदेश आर्थिक संकटमा पर्न सक्ने अवस्था छ।
शनिबार बसेको प्रदेश सभा कार्यव्यवस्था परामर्श समितिले आइतबार बैठक बोलाउने निर्णय गरेको थियो। बैठकअघि बिहान ११ बजे विपक्षी दलहरूसँगको विवाद समाधान गर्न सर्वदलीय बैठक आह्वान गरिएको छ। प्रदेश सभा सचिवालयका सूचना अधिकारी सुरेन्द्र महतोले यो जानकारी दिए।
नेपाली कांग्रेसका प्रमुख सचेतक कुमारकान्त झाले बजेट समयमै पारित नभए प्रदेश आर्थिक संकटमा फस्ने बताए। यसै कारण बैठक बोलाउने प्रस्तावमा सहमति जुटेको थियो।
बजेटप्रति असन्तुष्टि जनाउँदै विपक्षी दलले प्रदेश सभा बैठक लगातार अवरुद्ध पारेका छन्। यसले गर्दा असार १४ गतेयता बैठक बस्न सकेको छैन।
मधेस प्रदेशमा नेपाली कांग्रेस, नेकपा (एमाले) र नेकपाको गठबन्धन सरकार छ। विपक्षी दलले उपभोक्ता समितिमार्फत बजेट नियन्त्रण गर्ने नाममा कमिसनमुखी र सत्ता पक्षका निर्वाचन क्षेत्र केन्द्रित बजेट ल्याएको आरोप लगाएका छन्।
प्रमुख प्रतिपक्षी दल जनता समाजवादी पार्टी (नेपाल) का संसदीय दलका नेता सरोज यादवले बजेट अवरुद्ध पार्ने आफ्नो रहर नभएको स्पष्ट पारे। उनले जनताको विकासभन्दा अर्बौं रुपैयाँको ‘सेटिङ’ मा कार्यक्रम समेटिएको बताए। कमिसनमुखी योजना र सत्तारुढ सांसदको निर्वाचन क्षेत्रलाई प्राथमिकता दिएकाले विरोध गर्नुपरेको उनको प्रतिक्रिया छ।
आजको सर्वदलीय बैठकबाट सहमति जुटेमा प्रदेश सभाले बजेटमाथि छलफल अघि बढाएर पारित गर्ने प्रयास गर्नेछ।
