महोत्तरीको बर्दिबास–३ मा वन क्षेत्र अतिक्रमण खाली गराउन पुगेको डिभिजन वन कार्यालयको गाडी स्थानीयले जलाएका छन्। सोमबार राति (जेठ ११) भएको घटनाले बीपी राजमार्ग अवरुद्ध भएको छ।
वन कार्यालयको टोलीले सोमबार दिउँसो अव्यवस्थित बसोबास खाली गराउन सूचना दिएको थियो। त्यसपछि स्थानीयले राति राजमार्ग अवरुद्ध गरी प्रदर्शन सुरु गरेका थिए। बाटो खुलाउन गएको प्रहरीसहितको टोलीलाई स्थानीयले मंगलबार बिहान २ बजेसम्म घेरा हालेका थिए। डीएसपी शैलेन्द्रकुमार भट्टका अनुसार, झडपको स्थिति बनेपछि अश्रुग्यास प्रहार गरी बाटो खुलाइएको थियो।
डिभिजन वन कार्यालयका अनुसार, राजावास, कालापानी, वरडाँडालगायत क्षेत्रमा करिब १ हजार १०० हेक्टर वन क्षेत्र अतिक्रमण भएको छ। स्थानीयले घरटहरा निर्माण र खेतीपाती गर्दै आएका छन्। वन कार्यालयले प्रक्रिया अघि बढाएपछि आन्दोलन चर्किएको हो।
मंगलबार पुनः स्थानीय प्रदर्शनमा उत्रिए। उनीहरूले सडकमा काठका मुढा राखेर बीपी राजमार्ग अवरुद्ध पारेका छन्। सरकारले माग बेवास्ता गरेको उनीहरूको आरोप छ।
