हेटौँडा । मकवानपुरको हेटौँडा उपमहानगरपालिका–१९, बासुदेवमा खहरे खोलाले बगाउँदा एक बालिकाको मृत्यु भएको छ। मंगलबार साँझ निर्मल माध्यमिक विद्यालयका चार विद्यार्थी घर फर्कने क्रममा खोला तर्ने प्रयास गर्दा बगेका थिए।
खोलाले बगाएको स्थानभन्दा करिब ५०० मिटर तल रुखको जरामा अड्किएको अवस्थामा ८ वर्षीया रोसनी स्याङ्ताङको शव फेला परेको थियो। हेटौँडा अस्पताल पुर्याएपछि चिकित्सकले मृत घोषणा गरेका हुन्। Nmkhabarलाई प्रहरी नायब उपरीक्षक माधव काफ्लेले यो पुष्टि गरे।
यस्तै, ११ वर्षीया सुमित्रा भोलन र १२ वर्षीया बिनिता भोलन अझै बेपत्ता छन्। उनीहरूको खोजी तथा उद्धारका लागि सुरक्षाकर्मी परिचालन गरिएको छ।
१३ वर्षीया सीमा भोलन भने आफैँ खोलाबाट निस्कन सफल भएकी छन्। उनलाई सामान्य चोट लागेको छ।
