धनुषाको मिथिला नगरपालिकामा ४८३ भूमिहीन परिवारले आइतबार लालपुर्जा पाएका छन्, जसले वर्षौंदेखिको कानुनी स्वामित्वको अभाव अन्त्य गरेको छ।
लालपुर्जा प्राप्त गर्ने परिवारहरू मिथिला नगरपालिकाको वडा नम्बर ६, ७, ८ र ९ का हुन्। जिल्लास्थित नापी कार्यालय दुई नम्बर टोली ढल्केवरले आवश्यक कागजातसहित नापनक्साको प्रक्रिया पूरा गरेर लालपुर्जा वितरण गरेको हो।
नापी कार्यालय दुई नम्बर टोलीका प्रमुख सीयाराम साहका अनुसार, लालपुर्जाका लागि कुल ६५८ जनाले निवेदन दिएका थिए। यसअघि पनि सोही टोलीले मिथिला नगरपालिकाको वडा नम्बर १, ६ र ७ का ६४ भूमिहीन सुकुम्बासी परिवारलाई कानुनी प्रक्रिया पूरा गरी लालपुर्जा वितरण गरिसकेको थियो।
गाउँब्लकको जग्गा नापजाँच गरेर लालपुर्जा वितरण प्रक्रिया नापी कार्यालय धनुषाको दुई नम्बर टोलीले सुरु गरेको थियो। त्यसैको आधारमा अहिले लालपुर्जा वितरण भइरहेको प्रमुख साहले जानकारी दिए।
आइतबार आयोजित समारोहमा जिल्ला समन्वय समितिका प्रमुख राजनन्दन मण्डल र मिथिला नगरपालिकाका प्रमुख महेन्द्र महतोलगायतका पदाधिकारीले सम्बन्धित जग्गाधनीलाई लालपुर्जा वितरण गरेका थिए। कार्यक्रममा नापी कार्यालयका प्रमुख उमेश साहको अध्यक्षता रहेको खबरहबले जनाएको छ।
जिल्ला समन्वय समितिका प्रमुख मण्डलले लामो समयको संघर्षपछि लालपुर्जा प्राप्त गर्नेहरूलाई बधाई दिँदै लालपुर्जा पाउने प्रक्रियाबाट छुटेकाहरूलाई यथाशीघ्र कानुनी प्रक्रिया पूरा गरेर भोगाधिकार दिलाउन अनुरोध गरे। उनले पालिका प्रमुख, उपप्रमुख तथा वडाध्यक्षहरूलाई पनि आपसी विवादबाट मुक्त भई कार्य गर्न आग्रह गरे।
मिथिला नगरपालिकाका प्रमुख महतोले लालपुर्जा पाएपछि भूमिहीनहरू रैतीबाट शासक बनेको बताए। उनले सबैको सहकार्य र समन्वयमा नगरको विकास गर्नुपर्ने आवश्यकता औँल्याए।
धनुषा जिल्लामा कुल ७५ वटा गाउँब्लक छन्। तीमध्ये ७२ वटा गाउँब्लकको जग्गा नापजाँच भइसकेको छ भने १२ वटा गाउँब्लकको धनीपुर्जा वितरण भइसकेको नापी कार्यालयले जनाएको छ।
