भारतीय अभिनेता नाना पाटेकरको ७५ वर्षको उमेरमा अक्टोबर ८, २०२६ मा गोवामा निधन भएको छ।
डोना पाउलास्थित आफ्नै निवासमा उनलाई हृदयाघात भएपछि अस्पताल लगिएको थियो। चिकित्सकहरूले करिब ४५ मिनेटसम्म सीपीआर दिएर बचाउने प्रयास गरे पनि सफल हुन सकेनन् र बिहान ५:२० बजे उनलाई मृत घोषणा गरिएको हो।
उनको मृत्युको यकिन कारण पत्ता लगाउन पोस्टमार्टम गरिने जनाइएको छ। नाना पाटेकरका छोरा मल्हार पाटेकरले आफ्ना पिताको निधन भएको पुष्टि गरेका छन्।
नाना पाटेकरले आफ्नो करिब पाँच दशक लामो फिल्मी करियरमा ‘गमन’, ‘अंकुश’, ‘परिन्दा’, ‘क्रान्तिवीर’, ‘तिरंगा’, ‘अब तक छप्पन’, ‘अपहरण’ र ‘वेलकम’ लगायतका थुप्रै सफल चलचित्रमा अभिनय गरेका थिए। उनले ३ वटा राष्ट्रिय फिल्म अवार्ड र ४ वटा फिल्मफेयर अवार्ड पनि जितेका थिए।
सन् २०१३ मा भारत सरकारले उनलाई पद्मश्रीबाट सम्मानित गरेको थियो। नाना पाटेकरको जन्म १ जनवरी १९५१ मा महाराष्ट्रको रायगढ जिल्लाको मुरुड–जञ्जिरा गाउँमा भएको थियो।
नाना पाटेकर र अभिनेत्री तनुश्री दत्ताबीचको विवाद सन् २००८ मा ‘हर्न ओके प्लिज’ को सेटबाट सुरु भएको थियो, जुन सन् २०१८ मा #MeToo अभियानका क्रममा पुनः चर्चामा आएको थियो। यद्यपि, सन् २०१९ मा मुम्बई प्रहरीले प्रमाणको अभाव भन्दै मुद्दा बन्द गर्न बी-समरी रिपोर्ट पेस गरेको थियो। सन् २०२५ मा अदालतले तनुश्री दत्ताको याचिका खारेज गरेको थियो।
यसअघि: बलिउडका चर्चित अभिनेता नाना पाटेकरको ७५ वर्षको उमेरमा निधन
