नेपाल र चीनबीच सञ्चालित विकास आयोजनाहरूको द्रूत कार्यान्वयनका लागि गठित सहजीकरण संयन्त्रको तेस्रो बैठक सम्पन्न भएको छ। बैठकले दुई देशका शीर्ष नेताहरूबीच भएका समझदारी तथा सम्झौताहरूलाई प्रभावकारी रूपमा कार्यान्वयन गर्ने सहमति गर्यो।
नेपालका लागि चिनियाँ राजदूत झाङ माओमिङ र परराष्ट्र सचिव अमृतबहादुर राईको सहअध्यक्षतामा बसेको बैठकले द्विपक्षीय सहयोग र आर्थिक साझेदारीलाई नयाँ उचाइमा पुर्याउने विश्वास व्यक्त गर्यो।
यसैबीच, भारतले नेपाल-भारत सीमा सम्बन्धी विषय द्विपक्षीय संयन्त्रमार्फत समाधान गरिने स्पष्ट पारेको छ। नयाँ दिल्लीमा आयोजित पत्रकार सम्मेलनमा भारतको विदेश मन्त्रालयका प्रवक्ता रणधीर जयसवालले सीमांकन कार्य करिब ९८ प्रतिशत पूरा भएको जानकारी दिए।
उनले गण्डक नदीको धार परिवर्तनका कारण केही स्थानमा प्राविधिक जटिलता देखिएको बताए। पहिले सीमांकन भइसकेका क्षेत्रमा दशगजा अतिक्रमणबारे दुवै पक्षले संयुक्त अध्ययन गरिरहेको उनले उल्लेख गरे। प्रवक्ता जयसवालले सीमा मामिला पूर्णतः दुई देशबीचको विषय भएको र यसमा तेस्रो पक्षको भूमिका नहुने स्पष्ट पारे।
