नेपाल आयल निगमका कार्यकारी निर्देशक डा. चण्डिकाप्रसाद भट्टले पदबाट राजीनामा दिएका छन्।
उनले बुधबार उद्योग वाणिज्य तथा आपूर्ति मन्त्रालयमा राजीनामा पत्र बुझाए। मन्त्रालयका प्रवक्ता नेत्रप्रसाद सुवेदीले यो जानकारी दिएका हुन्। प्रवक्ता सुवेदीले भट्टको राजीनामा पुष्टि गरेका हुन्।
सरकारले ‘सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३’ ल्याएको छ। यस मार्फत ठूलो सङ्ख्यामा राजनीतिक नियुक्ति खारेज गर्ने प्रक्रिया अघि बढेको छ।
सबै राजनीतिक नियुक्ति खारेज गर्ने निर्णय गरे पनि आयल निगमको नेतृत्व त्यसमा नपरेको थियो। यद्यपि, भट्टले आफैँ राजीनामा दिएर सरकारलाई मार्ग प्रशस्त गरेका हुन्।
भट्टलाई २०८० फागुन ६ गतेको मन्त्रीपरिषद्ले नियुक्त गरेको थियो। यसअघि उनी २०७० सालमा पनि कार्यकारी निर्देशक भएर काम गरिसकेका थिए।
