उच्च अदालत तुलसीपुर बुटवल इजलासले ५० लाख धरौटी तोकेपछि एनआईएमबी बैंकका कर्मचारी रिसभ कार्की १ करोड ६५ लाख ठगी मुद्दामा कारागार चलान भएका छन्।
उच्च अदालत तुलसीपुर बुटवल इजलासले बिहीबार कार्कीलाई ५० लाख रुपैयाँ धरौटी ताकेको थियो। धरौटी बुझाउन नसकेपछि उनलाई कारागार पठाइएको प्रहरी उपरिक्षक सन्तोष आचार्यले बताए।
बुटवल इजलासका न्यायाधीशद्वय रमेश ढकाल र चन्द्रमणि ज्ञवालीले ५० लाख धरौटीको निर्णय गरेका थिए।
कार्कीले मोबाइल बैंकिङ र कनेक्ट आईपीएसमार्फत ग्राहकको खाताबाट अलर्टविहीन १ करोड ६५ लाख रुपैयाँ आफ्नो खातामा सारेका थिए।
इलाका प्रहरी कार्यालय पकडीको टोलीले उनलाई चैत पहिलो साता पक्राउ गरेको थियो। ग्राहकको रकम अनधिकृत रूपमा हिनामिना गरेको आरोपमा उनी पक्राउ परेका थिए।
डेढ महिना लामो अनुसन्धानपछि कार्कीलाई अदालत पेस गरियो।
