नेपाल प्रिमियर लिग (एनपीएल) २०२६ को लिग चरणमा बुधबार लुम्बिनी लायन्स र काठमाडौं गुर्खाज विजयी भएसँगै प्ले-अफको दौडमा सबै ८ टिमको सम्भावना कायमै रहेको छ। लुम्बिनी लायन्सले १६ रनको जित दर्ता गर्दै अंक तालिकाको शीर्षस्थानमा उक्लिएको छ भने काठमाडौं गुर्खाजले ९ विकेटको फराकिलो जित निकालेको छ।
बुधबारको पहिलो खेलमा लुम्बिनी लायन्सले जित दर्ता गरेपछि ४ खेलबाट ७ अंकसहित अंक तालिकाको शीर्षस्थानमा पुगेको छ। लुम्बिनीको नेट रन रेट +२.७८९ रहेको छ। दोस्रो खेलमा काठमाडौं गुर्खाजले ६२ बल बाँकी छँदै लक्ष्य पूरा गर्दै ९ विकेटको जित निकाल्यो। काठमाडौं ३ खेलबाट ४ अंकसहित दोस्रो स्थानमा छ र यसको नेट रन रेट +१.१३३ छ।
अंक तालिकामा कर्णाली याक्स ३ खेलबाट ४ अंकसहित तेस्रो स्थानमा छ भने जनकपुर बोल्ट्स ५ खेलबाट ४ अंकसहित चौथो स्थानमा छ। विराटनगर किंग्स, सुदूरपश्चिम रोयल्स र चितवन राइनोज क्रमशः पाँचौँ, छैटौँ र सातौँ स्थानमा छन्। पुछारमा रहेको पोखरा एभेन्जर्सले ३ खेलमा ० अंक जोडेको छ।
प्ले-अफ समीकरण
प्रतियोगितामा सहभागी सबै ८ टिम अझै पनि प्ले-अफको दौडमा छन्। लुम्बिनी लायन्सले अधिकतम १३ अंकसम्म पुग्न सक्नेछ भने काठमाडौं गुर्खाज र कर्णाली याक्सले १२-१२ अंक जोड्ने अवसर छ। जनकपुर बोल्ट्स र विराटनगर किंग्सले ८-८ अंकसम्म पुग्न सक्छन्। सुदूरपश्चिम रोयल्सले १० अंकसम्म र चितवन राइनोजले ११ अंकसम्म पुग्ने सम्भावना छ। पोखरा एभेन्जर्सले बाँकी ४ खेल जितेमा ८ अंकसहित प्ले-अफमा पुग्ने गणितीय सम्भावना अझै जीवित छ।
अंक बराबर भएमा नेट रन रेटले प्ले-अफमा पुग्ने टिमको निर्णय गर्नेछ।
