नेपाल प्रिमियर लिग (एनपीएल) २०२६ अन्तर्गत आज सुदूरपश्चिम रोयल्स र कर्णाली याक्सबीच कीर्तिपुरस्थित टीयू अन्तर्राष्ट्रिय क्रिकेट मैदानमा प्रतिस्पर्धा हुँदैछ। दिउँसो १२:३० बजे सुरु हुने यो खेल दुवै टोलीका लागि सेमिफाइनल यात्रामा निर्णायक मानिएको छ।
कप्तान दीपेन्द्रसिंह ऐरीको नेतृत्वमा रहेको सुदूरपश्चिम रोयल्सले जारी प्रतियोगितामा चार खेल खेलेको छ। दुईमा जित र दुईमा हार बेहोर्दै टोली अंक तालिकाको छैटौँ स्थानमा ४ अंक जोडेर बसेको छ। सुदूरपश्चिमले लुम्बिनी लायन्स र विराटनगर किंग्ससँग पराजय भोगेको थियो भने पोखरा एभेन्जर्स र चितवन राइनोजलाई हराएको थियो।
उता, सोमपाल कामीको कप्तानीमा रहेको कर्णाली याक्सले भने अपेक्षाकृत राम्रो प्रदर्शन गरिरहेको छ। तीन खेल खेलेको कर्णालीले दुईमा जित र एकमा हार बेहोर्दै अंक तालिकाको तेस्रो स्थानमा ४ अंक बटुलेको छ। कर्णालीले जनकपुर बोल्ट्स र विराटनगर किंग्सलाई हराएको थियो तर काठमाडौं गुर्खाजसँग पराजित भएको थियो।
सेमिफाइनल दौडमा आजको खेलको महत्त्व
आजको खेल दुवै टोलीका लागि सेमिफाइनलमा स्थान बनाउन निर्णायक हुनेछ। सुदूरपश्चिमका लागि यो पाँचौँ खेल हो भने कर्णालीका लागि चौथो खेल। अंक तालिकामा ४ अंकसहित तेस्रो स्थानमा रहेको कर्णालीले आजको खेल जितेमा शीर्ष स्थानतर्फ उक्लिने मौका पाउनेछ। यता, छैटौँ स्थानमा रहेको सुदूरपश्चिमका लागि पनि जितले प्लेअफको सम्भावनालाई बलियो बनाउनेछ।
