काठमाडौं । नेपाल राष्ट्र बैंकले ६१ दिनका लागि बजारबाट ३० अर्ब रुपैयाँ झिकेको छ। बैंक तथा वित्तीय संस्थामा देखिएको अधिक तरलता (बढी पैसा) व्यवस्थापन गर्न निक्षेप संकलन उपकरणमार्फत रकम तानिएको हो।
पछिल्लो समय बजारमा तरलता बढेपछि राष्ट्र बैंकले पैसा तान्ने रणनीति अपनाएको छ। यसअघि एक वर्षका लागि २ खर्ब रुपैयाँ ऋणपत्रमार्फत झिकिएको थियो। तर, तरलता नघटेपछि थप ३० अर्ब रुपैयाँ झिक्ने निर्णय भएको हो।
निक्षेप संकलनमा रकम राख्न इच्छुक बैंक तथा वित्तीय संस्थाले आज दिउँसो ३ बजेसम्म अनलाइन बोलकबोल गर्न सक्नेछन्। यसमा ‘क’, ‘ख’ र ‘ग’ वर्गका बैंक तथा वित्तीय संस्था सहभागी हुन पाउनेछन्। खरिद गरिएको निक्षेप संकलन उपकरण अन्य बैंकमा धितोका रूपमा प्रयोग गर्न सकिनेछ।
बोलकबोल कम्तीमा १० करोड र बढीमा ५ करोडका गुणनखण्डमा गर्न सकिनेछ। बोलकबोल ब्याजदरमा हुनेछ र बहुब्याजदरमा पनि बहु–बोलकबोल गर्न सकिने व्यवस्था छ।
