नुवाकोटको म्यागङ गाउँपालिकाका सूचना प्रविधि अधिकृत विरेन्द्र तामाङ घुससहित अख्तियार दुरुपयोग अनुसन्धान आयोगको नियन्त्रणमा परेका छन्। आयोगले सोमबार काठमाडौं महानगरपालिका–१६, बालाजुबाट तामाङलाई रंगेहात पक्राउ गरेको हो।
सेवाग्राहीसँग भुक्तानी प्रक्रिया सम्पन्न भइसकेपछि पनि ‘कमिसन’ माग्दै बार्गेनिङ गरेको र अनावश्यक दुःख–हैरानी दिएको उजुरी परेको थियो। सोही उजुरीका आधारमा आयोगले निगरानी तथा अनुसन्धान अघि बढाएको थियो।
अनुसन्धानका क्रममा तामाङले सेवाग्राहीबाट घुसस्वरूप एक लाख रुपैयाँ लिइरहेको अवस्थामा पक्राउ परेका हुन्। अख्तियारका प्रवक्ता सुरेश न्यौपानेका अनुसार तामाङको साथबाट घुसको एक लाख रुपैयाँसँगै स्रोत खुलाउन नसकेको थप ५ हजार रुपैयाँ पनि बरामद भएको छ। आयोगले घटनाबारे थप अनुसन्धान भइरहेको जनाएको छ।
