अपडेट (11:57, 2026-10-04)
गत असोज ११ गते कालीगण्डकी नदीमा आएको बाढीले पर्वतको जलजला गाउँपालिका–८ फोर्से बजारमा ठूलो क्षति पुर्याएको छ। यसअघि असोज १२ देखि १५ गतेसम्मको बाढीपहिरो भनिएकोमा, मुख्य बाढी असोज ११ गते आएको हो। बाढीले फोर्सेका ७५ घर–टहरा पूर्ण रूपमा बगाएको छ भने २७ घर उच्च जोखिममा परेका छन्। स्थानीय युवाले राति माइकिङ गरी पूर्वसूचना दिएकाले बस्ती खाली गराइएकाले मानवीय क्षति भने हुन नपाएको जलजला गाउँपालिकाले जनाएको छ।
बाढीबाट फोर्से बजारका करिब ३०० जना प्रभावित भएका छन् भने सयौँ मुरी धान फल्ने खेत बगरमा परिणत भएको छ। फोर्से र बागलुङको ढोडेनी जोड्ने पुरानो झोलुङ्गे पुल पनि बाढीले बगाएको छ। यसअघि पहुँच सडकमा क्षति भनिएको पर्वत–बागलुङ जोड्ने मध्यपहाडी लोकमार्गको मालढुङ्गा पुलको आधारमा क्षति पुगेपछि दुई जिल्लाबीचको सवारी आवागमन पूर्ण रूपमा ठप्प भएको प्रहरीले जनाएको छ। विद्युत तथा टेलिफोन सम्पर्कमा समस्या देखिएकाले क्षतिको विस्तृत विवरण सङ्कलनमा कठिनाइ भइरहेको प्रमुख जिल्ला अधिकारी गङ्गाबहादुर क्षेत्रीले बताउनुभयो।
नेपाली सेनाले ६०२ जनालाई उद्धार गरी सुरक्षित स्थानमा सारेको छ भने जलजला गाउँपालिकालगायत दुर्गम प्रभावित क्षेत्रमा ९७९ किलो राहत सामग्री ढुवानी गरेको छ। लायन्स क्लब अफ शिवालय कुश्मा पर्वतले जर्मनीकी दाता कथारिना बोइगरको सहयोगमा असोज १३ गते करिब ४ लाख रुपैयाँ बराबरको खाद्यान्न तथा लत्ताकपडा ५१ बाढीपीडित परिवारलाई वितरण गरेको छ। गण्डकी प्रदेशका मुख्यमन्त्री सुरेन्द्रराज पाण्डेले फोर्सेको निरीक्षण गरी पुनर्निर्माण र पुनःस्थापनामा सरकारले साथ दिने प्रतिबद्धता व्यक्त गर्नुभएको छ। जलजला गाउँपालिकाले क्षतिको विवरण सङ्कलन र पुनःस्थापनाका लागि १४ वटा समूह खटाएको छ।
पर्वतमा बाढीपहिरोका कारण तीन सय परिवार विस्थापित भएका छन्।
जिल्ला प्रशासन कार्यालयका अनुसार असोज १२ देखि १५ गतेसम्मको बाढीपहिरोले १७० घर पूर्ण रूपमा र १३१ घर आंशिक रूपमा क्षति भएका हुन्। यसबाट जिल्लाका सातमध्ये छवटा पालिका प्रभावित बनेका छन्।
पर्वतका प्रमुख जिल्ला अधिकारी गङ्गाबहादुर क्षेत्रीले दिएको जानकारीअनुसार सबैभन्दा बढी जलजला गाउँपालिकामा ११३ घरमा क्षति पुगेको छ। त्यहाँ १७१ परिवार विस्थापित भएका छन् भने ५८ घर पहिरोको जोखिममा छन्। कुश्मा, फलेवास, बिहादी, महाशिला र मोदी गाउँपालिकामा पनि घरहरूमा पूर्ण क्षति भएको छ।
बाढीपहिरोले पाँच विद्यालय भवन, कृषि फार्म, मन्दिर, स्वास्थ्य चौकी र प्रहरी चौकीमा समेत क्षति पुर्याएको छ। पर्वत–बागलुङ जोड्ने मालढुङ्गा पुलको पहुँच सडकमा क्षति पुगेपछि सवारी आवागमन बन्द छ। मध्यपहाडी लोकमार्गको कुश्मा खण्डमा अस्थायी मार्ग खोली असोज १५ गतेदेखि एकतर्फी यातायात सञ्चालनमा आएको छ।
विस्थापितहरूलाई स्थानीय प्रशासन, स्थानीय निकाय र नेपाल रेडक्रस सोसाइटीलगायतका संस्थाले त्रिपाल, खाद्यान्न तथा अन्य आवश्यक सामग्री उपलब्ध गराएका छन्।
मालढुङ्गा पुल र कालीगण्डकी लोकमार्गअन्तर्गत फलेवास–बिहादी तथा लुङ्खुदेउराली–हुवास सडक सञ्चालनमा आउन अझै केही दिन लाग्नेछ। विस्थापित परिवारको दीर्घकालीन पुनर्स्थापना र कुल आर्थिक क्षतिको विस्तृत विवरण अझै सार्वजनिक भएको छैन।
