राहदानी खरिद प्रक्रियामा भ्रष्टाचारजन्य कसुरको अनुसन्धानका लागि अख्तियार दुरुपयोग अनुसन्धान आयोगले तत्कालीन परराष्ट्रमन्त्री डा. आरजु राणा देउवालाई बयानका लागि बोलाएको छ। आयोगको टोलीले बूढानीलकण्ठस्थित निवासमा म्याद टाँसेको छ। अख्तियार दुरुपयोग अनुसन्धान आयोग नियमावली, २०५९ को नियम १४ अनुसार जारी सूचनामा तीन दिनभित्र टंगालस्थित आयोगको कार्यालयमा उपस्थित हुन निर्देशन छ।
राणा हाल उपचारका लागि विदेशमा रहेकाले आयोगले जनप्रतिनिधिको रोहबरमा घरमा म्याद टाँसेको हो। राहदानी छपाइको ठेक्का प्रक्रियामा अनियमितता भएको उजुरीका आधारमा राणासँग बयान लिन लागिएको हो।
यस प्रकरणमा आयोगले यसअघि राहदानी विभागका महानिर्देशक तीर्थराज अर्याल, सूचना प्रविधि निर्देशक सुनीलकुमार केसी र तत्कालीन लेखा प्रमुख तुलसीप्रसाद आचार्यलाई नियन्त्रणमा लिइसकेको छ। उनीहरूविरुद्ध विशेष अदालतबाट थुनामा राखेर अनुसन्धान गर्न अनुमति लिइएको छ। अनुसन्धान क्रममा तत्कालीन मन्त्री राणाको समेत संलग्नता देखिएपछि बयानका लागि बोलाइएको हो।
सार्वजनिक सूचनामा भनिएको छ, ‘राहदानी छपाई सम्बन्धी कार्यमा भ्रष्टाचारजन्य कसुर गरेको भन्ने उजुरीको अनुसन्धानको सिलसिलामा तपाईँसँग बयान लिनुपर्ने भएकोले आयोगको महाशाखा नं. १२, कोठा नं. १२ टंगालमा उपस्थित हुन आउनुहोला। नआए कानुन बमोजिम हुनेछ।’
डा. राणा र नेपाली कांग्रेसका सभापति शेरबहादुर देउवा गत फागुन १३ गते उपचारका लागि सिंगापुर प्रस्थान गरेका थिए। हाल उनी हङकङमा छिन्। आयोगले म्याद तामेल गर्दा देउवा परिवारका सदस्य उपस्थित नभए पनि वडाका प्रतिनिधिहरूको रोहबरमा कानुनी प्रक्रिया पूरा गरेको जनाएको छ।
यसैबीच, इमेलमार्फत जवाफ दिँदै आरजु राणा देउवाले तीन दिनभित्र आयोगमा उपस्थित हुन नसक्ने बताएकी छन्।
