वीरगञ्ज नाका हुँदै चालु आर्थिक वर्षको १० महिनामा एक खर्ब ८१ अर्ब ७० करोड रुपैयाँ बराबरको पेट्रोलियम पदार्थ आयात भएको छ। गत आवको सोही अवधिको तुलनामा मूल्यका आधारमा यो आयात १६.३५ प्रतिशतले बढेको हो।
गत आवको १० महिनामा एक खर्ब ५६ अर्ब १७ करोड रुपैयाँ बराबरको पेट्रोलियम पदार्थ आयात भएको थियो। चालु आवको १० महिनामा यो रकम २५ अर्ब ५३ करोडले बढेर एक खर्ब ८१ अर्ब ७० करोड पुगेको छ।
यस अवधिमा पेट्रोलियम पदार्थको आयातबाट ६७ अर्ब १९ करोड रुपैयाँ राजस्व संकलन भएको छ। वीरगञ्ज भन्सार कार्यालयका सूचना अधिकारी उदयसिंह विष्टले यो तथ्याङ्क पुष्टि गरे।
आयातित पेट्रोलियम पदार्थमध्ये डिजेलको हिस्सा बढी छ। चालु आवको १० महिनामा एक खर्ब ५७ करोड रुपैयाँ मूल्य बराबरको आठ लाख ९५ हजार दुई सय ४६ किलोलिटर डिजेल आयात भएको छ। गत आवको सोही अवधिमा भने ७९ करोड ५७ लाख रुपैयाँ मूल्य बराबरको नौ लाख ८५७ किलोलिटर डिजेल आयात भएको थियो।
पेट्रोल आयात पनि बढेको छ। चालु आवको १० महिनामा ३५ अर्ब ७९ करोड रुपैयाँ मूल्य बराबरको तीन लाख ९० हजार ६१५ किलोलिटर पेट्रोल आयात भएको छ। गत आवमा ३१ अर्ब ७१ करोड रुपैयाँ मूल्य बराबरको तीन लाख ६७ हजार ३४४ किलोलिटर पेट्रोल आयात भएको थियो।
एलपिजी ग्यासको आयात भने परिमाण र मूल्य दुवैका हिसाबले घटेको छ। चालु आवको १० महिनामा २५ अर्ब ५४ करोड रुपैयाँ मूल्य बराबरको २४ करोड २७ लाख तीन हजार १५० किलोग्राम एलपिजी ग्यास आयात भएको छ। गत आवको सोही अवधिमा भने ३० अर्ब २८ करोड रुपैयाँ मूल्य बराबरको २६ करोड ४१ लाख १४ हजार ३२६ किलोग्राम एलपिजी ग्यास आयात भएको थियो।
