बाढी र पहिरोले बागमती र कोशी प्रदेशका राजमार्ग ठप्प पारेको छ। नेपाल प्रहरीका अनुसार बीपी राजमार्गको खुक–नेपालथोक–कटुन्जेबेँसी सडकखण्ड प्रभावित छ।
रसुवाका मुख्य राजमार्ग पूर्ण रूपमा अवरुद्ध छन्। अर्को सूचना जारी नभएसम्म यातायात सञ्चालन नहुने प्रहरीले जनाएको छ।
नुवाकोटको शिवपुरी गाउँपालिका–८ घट्टेखोलामा टोखा–छहरे सडकखण्ड बाढी र पहिरोको उच्च जोखिममा छ। राति १० बजेदेखि बिहान ५ बजेसम्म सवारी रोक्न निर्देशन दिइएको छ।
विदुर नगरपालिका–१० सिमटारमा पासाङ ल्हामु सडकखण्ड बाढीले पूर्ण रूपमा अवरुद्ध छ।
धादिङको बेनीघाट रोराङ गाउँपालिका–१० ज्वालामुखी र शीतलबजार क्षेत्रमा पृथ्वी लोकमार्ग पहिरोले प्रभावित छ। दुवै स्थानमा एकतर्फी सवारी सञ्चालन भइरहेको छ।
संखुवासभाको मकालु गाउँपालिका–४ नेता भीरमा पहिरोका कारण कोशी राजमार्ग पूर्ण रूपमा अवरुद्ध छ।
