झापाको रतुवा खोलामा आकर्षक पुल निर्माण कार्य ५० प्रतिशतभन्दा बढी सम्पन्न भएको छ। सडक विभागको नीति अनुरूप पूर्व–पश्चिम राजमार्गका ठुला पुललाई ‘ल्याण्डमार्क ब्रिज’ का रूपमा विकास गरिँदैछ।
काँकडभिट्टा–लौकही सडक खण्डका ६ ठुला पुलमध्ये ५८५ मिटर लामो रतुवा पुलको निर्माण अन्तिम चरणमा छ। कोरियाली परामर्शदाता ‘सोसुङ’ ले डिजाइन गरेको यो पुल आधुनिक ‘आर्च स्टिल ट्रस’ प्रविधिमा आधारित छ।
योजना प्रमुख जगत प्रजापतिका अनुसार पुल १६.५ मिटर चौडा हुनेछ। यसमा डबल लेन, सर्भिस लेन र फुटपाथको व्यवस्था छ। पुललाई कलात्मक र बलियो बनाउन ८७ देखि ९० मिटरसम्मका स्पान राखिएका छन्। पुल निर्माणमा प्रयोग भएको ४१० र ४२० ग्रेडको स्टिल चीनबाट आयात गरिएको हो।
निर्माण व्यवसायीले मोरङको उर्लाबारीमा ‘फ्याब्रिकेसन यार्ड’ स्थापना गरेका छन्। यार्डमा सीएनसी मेसिनमार्फत कम्प्युटराइज्ड कटिङ र नियन्त्रित वेल्डिङ भइरहेको छ। नेपालमै पहिलो पटक ठुलो ग्याल्भेनाइजेसन ट्याङ्क निर्माण गरी संरचनालाई खिया लाग्नबाट जोगाइँदैछ।
लोहेन्द्र, बक्रा र रतुवा खोलाका तीन पुल एउटै प्याकेजमा ठेक्का लगाइएको थियो। तीनवटै पुलको कुल लागत करिब साढे ५ अर्ब रुपैयाँ छ। कोबेक, सीआरइजिसी र तुँदी जेभीले निर्माण गरिरहेका छन्। स्टिलको काम चिनियाँ प्राविधिकले र पिएससी गर्डरको काम तुँदीले गरिरहेको छ। पुल सन् २०२७ फेब्रुअरी २ सम्ममा सम्पन्न हुनुपर्नेछ।
वर्षायाममा चीनबाट स्टिल ढुवानीमा सडक अवरोधले केही समस्या आएको प्रजापतिले बताए। विद्युतीय तार स्थानान्तरण जस्ता समन्वयका काम सम्पन्न भइसकेका छन्।
करिब ८० वर्ष आयु हुने अनुमानित यो पुलले आगामी ५० वर्षसम्मको सवारी चाप धान्ने प्राविधिकहरूको दाबी छ। हालको करिब ५० वर्ष पुरानो पुलको विकल्पमा यो संरचनाले पूर्व–पश्चिम राजमार्गमा आवागमन सहज र सुरक्षित बनाउनेछ।
