रौतहटमा पर्यटन पूर्वाधार निर्माणमा वास्तविक कामभन्दा बढी देखाएर ६ लाख ८० हजार ५९२ रुपैयाँ ४३ पैसाको भुक्तानी लिएको आरोपमा अख्तियार दुरुपयोग अनुसन्धान आयोगले पाँच जनाविरुद्ध भ्रष्टाचार मुद्दा दायर गरेको छ।
पर्यटन विकास कार्यालय, गौरबाट आर्थिक वर्ष २०८१/८२ मा परोहा नगरपालिका–९ स्थित रामपुर पोखरीको डिलमा शिवनाथ भवन, भैरवनाथ मन्दिर तथा राधाकृष्ण मन्दिरको अधुरो भवन निर्माण योजनामा अनियमितता भएको अख्तियारले ठहर गरेको छ।
स्वीकृत लागत अनुमानभन्दा बढी काम भएको भन्दै नापी किताब र कार्यसम्पन्न प्रतिवेदनमा विवरण उल्लेख गरियो। फिल्डमा भएको वास्तविक कामभन्दा बढी देखाएर उपभोक्ता समितिलाई भुक्तानी दिइएको अनुसन्धानबाट खुलेको छ।
स्थलगत नापजाँच र प्राविधिक परीक्षण गर्दा निर्माण परिमाण र नापी किताबको विवरण फरक भेटियो। बढी परिमाण देखाएर भुक्तानी गर्दा सरकारलाई ६ लाख ८० हजार ५९२ रुपैयाँ ४३ पैसाको आर्थिक क्षति पुगेको अख्तियारको दाबी छ।
तत्कालीन निमित्त कार्यालय प्रमुख राजेश काफ्ले, इन्जिनियर सुदीप प्रकाश तिमल्सेना, नितेश कुमार पटेल, उपभोक्ता समितिका अध्यक्ष खगेन्द्र साह तेली र कोषाध्यक्ष कुन्ती देवीलाई अख्तियारले प्रतिवादी बनाएको छ।
सरकारी कर्मचारी र उपभोक्ता समितिका पदाधिकारीको मिलेमतोमा वास्तविकताभन्दा बढी काम देखाएर प्रतिवेदन तयार पारिएको थियो। सोही विवरणका आधारमा उपभोक्ता समितिलाई बढी रकम भुक्तानी गरिएको अख्तियारले जनाएको छ।
अख्तियारले पाँचै जनाबाट ६ लाख ८० हजार ५९२ रुपैयाँ ४३ पैसा बिगो असुलउपर गर्न माग गरेको छ। भ्रष्टाचार निवारण ऐन, २०५९ बमोजिम कैद र जरिवानाको मागदाबीसहित मंगलबार विशेष अदालत, काठमाडौँमा मुद्दा दर्ता भएको छ।
पर्यटन प्रवर्द्धनका लागि छुट्याइएको बजेटबाट निर्माण हुने संरचनामा वास्तविक काम र कागजी विवरणबीच फरक देखिएपछि अख्तियारले प्राविधिक मूल्यांकन र भुक्तानी प्रक्रियामाथि प्रश्न उठाउँदै कारबाही अघि बढाएको हो।
